Hópur Íslendinga gerði eina bestu laxveiði í langan tíma sem sést hefur í Lakselva í Finnmörku í Norður-Noregi. Hópurinn landaði fiski sem náði þrjátíu pundum og öðrum 28 punda og þó nokkrum tuttugu plús löxum. Fjallað er um heimsókn Íslendinganna á heimasíðu árinnar, oldero.no.
Stærsta fiskinn í hollinu fékk Aðalsteinn Jóhannsson en hann var jafnframt aflahæstur með sjö laxa í vikuveiði. Lakselvan er ekki þekkt fyrir magnveiði en þeim mun frægari fyrir stórfiskana sem hún geymir og er met fiskurinn ríflega fimmtíu pund. Árlega veiðast nokkrir fiskar á bilinu fjörutíu til fimmtíu pund.
Mestu veiðina gerðu Íslendingarnir á hefðbundnar íslenskar aðfarir, Sunray shadow- og Frances-túpur.
Stórlaxinn sem Aðalsteinn landaði var 108 sentimetra langur og ummálið var 60 sentimetrar. Hann vigtaði fimmtán kíló eða þrjátíu pund.
„Þessi var að koma í ána í annað sinn. Hann hefur gengið út í fyrra eða í vor og hann er svakalegur. Hausinn á honum er eins á krókódíl,“ sagði Aðalsteinn um stórlaxinn í samtali við Sporðaköst.
Hermóður Hilmarsson Nesveiðimaður landaði 28 punda fiski með dóttur sinni, Alexöndru. Þar var á ferðinni hrygna sem var lúsug eins sjá má á myndinni. Hún mældist 103 sentimetra löng og ummálið var 60 sentimetrar og vigtuð var hún 14 kíló.
Í heildina gekk veiðin vel hjá hópnum og eins og segir á heimasíðunni þar sem fjallað er um viku 33. „Fantastic fishing.“
Lengd á laxi | Veiðisvæði | Veiðimaður | Dagsetning Dags. |
---|---|---|---|
101 cm | Vatnsdalsá | Erlendur veiðimaður | 29. september 29.9. |
101 cm | Eystri-Rangá | Grzegorz Loszewski | 27. september 27.9. |
105 cm | Hvítá við Iðu | Katrín Tanja Davíðsdóttir | 24. september 24.9. |
101 cm | Víðidalsá | Jón Eðvald Halldórsson | 22. september 22.9. |
107 cm | Grímsá | Jón Jónsson | 22. september 22.9. |
101 cm | Miðfjarðará | Agnar Sigurjónsson | 22. september 22.9. |
101 cm | Hvítá við Iðu | Gunnar Pétursson | 20. september 20.9. |