Veiði | mbl | 1.10.2018 | 16:36 | Uppfært 18:38

Veiði lokið í Stóru-Laxá

Reynir Sigmundsson landar laxi á svæði III rétt undir lok veiðitímans. Árni Baldursson

Veiði lauk í gær í Stóru-Laxá í Hreppum og var mikil veiði síðustu dagana á neðsta svæði árinnar og gáfu þeir síðustu tveir þar 80 laxa.

Formaður veiðifélagsins, Esther Guðjónsdóttir, var snögg til og hefur tekið saman lokatölur fyrir sumarið sem hún birti fyrr í dag.

Heildarveiðin í ánni var 643 laxar, 39 urriðar og 52 bleikjur. 206 laxar voru yfir 70 cm langir, en að sögn Estherar var misbrestur á skráningu lengdar í veiðibókinni. Þá veiddust tveir laxar yfir 100 cm, einn 103 í Ytri-Hvammi á svæði I og II rétt undir lok veiðitímans og annar 102 cm í Myrkhyl á svæði IV.

Á svæðum I og II veiddust 499 laxar og voru aflasælustu veiðistaðirnir Bergsnös (180 stk.), Laxárholt (88 stk.) og Kálfhagahylur (39 stk.).

Á svæði III komu 40 laxar á land, en að sögn Estherar var það lítið stundað í sumar. Flestir veiddust í Sveinskeri (12 stk.), Iðu (9 stk.) og Heljarþröm (8 stk.).

Á svæði IV, eða efsta svæðinu svokallaða, var 104 löxum landað í sumar. Eins og oft áður veiddust flestir á Hólmabreiðu (15 stk.), Myrkhyl (13 stk.) og Flatarbúð (10 stk.).

Seinustu hundraðkallar sumarsins

Lengd á laxi	Veiðisvæði	Veiðimaður	Dagsetning Dags.
101 cm	Vatnsdalsá	Erlendur veiðimaður	29. september 29.9.
101 cm	Eystri-Rangá	Grzegorz Loszewski	27. september 27.9.
105 cm	Hvítá við Iðu	Katrín Tanja Davíðsdóttir	24. september 24.9.
101 cm	Víðidalsá	Jón Eðvald Halldórsson	22. september 22.9.
107 cm	Grímsá	Jón Jónsson	22. september 22.9.
101 cm	Miðfjarðará	Agnar Sigurjónsson	22. september 22.9.
101 cm	Hvítá við Iðu	Gunnar Pétursson	20. september 20.9.