Opnunarhollið í Eldvatni í Meðallandi gerði góða veiði á fyrsta degi tímabilsins. Þrátt fyrir þétta snjókomu þegar leið á daginn. Urðu þeir félagar víða varir við sjóbirting og var hann í tökustuði, enda ekki séð flugu í býsna langan tíma.
Á fyrri vaktinni landaði hollið tíu vænum birtingum og missti líka. Stærsti fiskurinn var tæpir áttatíu sentímetrar og tók fluguna Orange skull. Þetta er þyngd straumfluga og hefur gefið vel í Eldvatninu, sérstaklega í opnun og fyrri hluta veiðitíma.
Helstu staðirnir sem voru að gefa voru Hundavað, Þórðuvörðuhylur og Mangatangi. Erlingur R. Hannesson sem var við veiðar í morgun sagði að víða hefði sést fiskur og þrátt fyrir snjóél væru menn kampakátir með veiðina. „Við höfum veitt hérna árum saman og vitum vel að á þessum árstíma er allra verðra von. Þá fer maður bara með því hugarfari. Við höfum mest fengið á Orange skull enda höfum við feikna trú á henni og það hjálpar.“ Elli eins og hann er kallaður sagði fiskinn í góðu standi og í ágætis holdum. Þó væri það auðvitað misjafnt.“
Öllum sjóbirtingi er sleppt í Eldvatninu og einungis er veitt á flugu.
Leigutakar opnuðu í dag Leirá skammt frá Akranesi. Það eru hjónin Harpa og Stefán í Iceland Outfitters sem leigja ána. Þau byrjuðu seint í dag en mikil snjókoma verið fyrr um daginn og í nótt. Fyrsta fiskinn fékk Harpa Þórðardóttir. 54 sentímetra sjóbirting sem tók straumfluguna Black Ghost. „Ég fékk hann í Brúarhyl rétt neðan við þjóðveg og þetta var mjög flottur fiskur og honum var að sjálfsögðu sleppt,“ sagði Harpa í samtali við Sporðköst.
Þeir feðgar Stefán Sigurðsson og Matthías sonur hans púpuðu svo upp sjóbirting í veiðistað 14a. Þessum fiskum var sleppt og sagðist Harpa hlakka til að komast í heitt skúringavatnið í vorhreingerningu í veiðihúsinu. Hún var orðin býsna loppin eftir veiðina.
Lengd á laxi | Veiðisvæði | Veiðimaður | Dagsetning Dags. |
---|---|---|---|
101 cm | Vatnsdalsá | Erlendur veiðimaður | 29. september 29.9. |
101 cm | Eystri-Rangá | Grzegorz Loszewski | 27. september 27.9. |
105 cm | Hvítá við Iðu | Katrín Tanja Davíðsdóttir | 24. september 24.9. |
101 cm | Víðidalsá | Jón Eðvald Halldórsson | 22. september 22.9. |
107 cm | Grímsá | Jón Jónsson | 22. september 22.9. |
101 cm | Miðfjarðará | Agnar Sigurjónsson | 22. september 22.9. |
101 cm | Hvítá við Iðu | Gunnar Pétursson | 20. september 20.9. |