Braut sér vök og landaði þremur

Eftir mildan fyrsta dag veiðitímans fengu veiðimenn víða um land vetrarveður á öðrum degi. Það stöðvaði ekki alla og sennilega fara ekki margir í förin hans Valgarðs Ragnarssonar leigutaka Húseyjarkvíslar. Miklar skarir voru komnar við ána á öðrum degi og þar sem sá á rennandi vatn var kraparek. Valli brá á það ráð að brjóta vök á ísinn þar sem hann vissi af sjóbirtingum. Hann ýtti ísnum frá og beið í nokkurn tíma eftir atganginn. Svo fór hann með flotlínu og þunga straumflugu og landaði þremur fallegum sjóbirtingum.

„Þetta var svona mitt á milli dorgveiði og vorveiði. Ég beið í svona kortér eftir að hafa ýtt klakanum í burtu og það dugði. Svo var áin alveg frosin í dag. Þetta var mjög kaflaskipt. Fyrsti dagurinn var frábær. Sól, logn og nokkrar gráður í plús. Svo kom bara stórhríð og veturinn minnti á sig,“ sagði Valgarður í samtali við Sporðaköst.

Opnun var engu að síður ágæt og var um þrjátíu sjóbirtingum landað og tuttugu urriðum. Um það bil helmingur af fiskinum var geldfiskur í góðum holdum. Stærsti sjóbirtingurinn mældist 78 sentimetrar og var það Þorsteinn Guðmundsson sem landaði honum.

Sportveiðimaðurinn James Ratcliffe. Veiddi Tungulækinn aðeins með flotlínu og í yfirborðinu. Hér hampar hann birtingi sem fékk svo frelsi. Ljósmynd/Aðsend

Í Tungulæk skammt frá Kirkjubæjarklaustri fóru menn sér rólega og ástunduðu einungis yfirborðsveiði og er það ólíkt því sem frést hefur af öðrum veiðisvæðum. Meðal þeirra sem voru við veiðar í Tungulæk var James Ratcliffe, landeigandi í Vopnafirði og nágrenni. Þeir lönduðu tólf birtingum sem telst ekki mikið í Tungulæk á fyrsta degi en það er svo sannarlega áskorun að fá fisk upp í yfirborðið þegar vatnið er skítkalt.

• Blogga um frétt

Seinustu hundraðkallar sumarsins