Gert er ráð fyrir því að báðar þekktustu laxveiðiár Vestfjarða verði vaktaðar með myndavélabúnaði í teljurum í sumar. Vöktunin miðar að því að fylgjast með og meta hlutdeild laxa af eldisuppruna í ánum. Slíkt vöktunarkerfi var sett upp í Laugardalsá í fyrra og framkvæmdir eru að hefjast við Langadalsá á næstu vikum og er stefnt að því að það verði komið í gagnið fyrir upphaf veiðitíma. Báðar eru árnar í Ísafjarðardjúpi. Þetta kemur fram í skýrslum um vöktunarrannsóknir sem Sigurður Már Einarsson fiskifræðingur og Ingi Rúnar Jónsson unnu og kom út í febrúar síðastliðnum.
Annað árið í röð veiddist eldislax í Laugardalsá, í fyrra. Laxins varð ekki vart í teljaraskráningu og er talið að hann hafi gengið í ána þegar teljarinn var bilaður í ágústmánuði. Eldislaxinn reyndist vera af norskum uppruna og kom úr stroki frá eldisstað Arnarlax við Hringsdal í Arnarfirði. Sumarið 2017 veiddist einnig fiskur í Laugardalsá sem talinn var eldisfiskur. Frétt þess efnis birtist á vef bb.is þann 28. september og var talið af sérfræðingum Hafrannsóknastofnunar að fiskurinn væri eldisfiskur. Bæði var hann uggaskemmdur og með samgróninga í innyflum sem geta komið í kjölfar bólusetningar eldisseiða, en slíkt sést ekki í villtum fiskum.
Fiskiteljarinn í Laugardalsá komst í gagnið í byrjun júní í fyrra og var starfræktur fram til 11. október, að því er kemur fram í vöktunarskýrslu þeirra Sigurðar Más og Inga Rúnars fyrir vatnasvæðið, sem kom út í janúar. Nokkur vandamál komu upp með teljarann, bæði vegna mikils lífræns reks í ánni og einnig settust bæði þörungar og mosi á búnaðinn. Þá kom upp bilun í ágúst. Til stendur að gera nokkrar breytingar á búnaðinum fyrir sumarið sem er fram undan til að minnka mögulegar rekstrartruflanir.
Lengd á laxi | Veiðisvæði | Veiðimaður | Dagsetning Dags. |
---|---|---|---|
101 cm | Vatnsdalsá | Erlendur veiðimaður | 29. september 29.9. |
101 cm | Eystri-Rangá | Grzegorz Loszewski | 27. september 27.9. |
105 cm | Hvítá við Iðu | Katrín Tanja Davíðsdóttir | 24. september 24.9. |
101 cm | Víðidalsá | Jón Eðvald Halldórsson | 22. september 22.9. |
107 cm | Grímsá | Jón Jónsson | 22. september 22.9. |
101 cm | Miðfjarðará | Agnar Sigurjónsson | 22. september 22.9. |
101 cm | Hvítá við Iðu | Gunnar Pétursson | 20. september 20.9. |