Fín byrjun í Eystri-Rangá

Veiði hófst í Eystri-Rangá í morgun og lofar byrjunin góðu. Sex laxar komu á land og sáust víða fiskar. Til að mynda uppi á veiðisvæði sex. Þá voru menn að missa fiska og sjá hann stökkva.

Þeir laxar sem veiddust í morgun voru á bilinu 74 til 89 sentímetrar; fimm hrygnur og einn hængur. Fjórir veiddust á ásnum en tveir ofar. Guðmundur Atli Ásgeirsson hjá Fly fishing in Iceland annast sölu veiðileyfa í Eystri um þessar mundir og hann sagði í samtali við Sporðaköst að aðstæður væru góðar. „Það er smágrámi í ánni, vottar fyrir snjóbráð og þetta lítur bara vel út.“ Hann sagði Eystri-Rangá vel selda næstu daga en laus leyfi væru einhver síðar í mánuðinum.

Erlendur veiðimaður með einn af fyrstu fiskum sumarsins úr Eystri Rangá. Eins og sést hafa menn ekki áhyggjur af vatnsleysi á þessum bænum. Ljósmynd/Aðsend

Eystri-Rangá er ekki þjökuð af þeim miklu þurrkum sem gera veiðimönnum víða erfitt fyrir. Báðar Rangárnar treysta á seiðasleppingar og endurheimtur. Þar er ekki veiða-og-sleppa-fyrirkomulag enda lítið sem ekkert um að fiskur hrygni í ánum. Eystri-Rangá hefur oft verið í hópi aflahæstu áa á landinu og þessi byrjun lofar góðu.

• Blogga um frétt

Seinustu hundraðkallar sumarsins