Góðar byrjun í Víðidal og Rangá ytri

Laxveiðiárnar opna nú hver af annari. Ytri Rangá tók vel á móti fyrstu veiðimönnum í morgun og var níu löxum landað á fyrstu vaktinni. Flestir tóku þeir litlar HKA-Sunray flugur. Mest líf var á Rangárflúðum en þar landaði Olaf Furre leigutaki fimm löxum í morgun.

„Þetta var afskaplega ljúft hjá okkur, víða fiskur og glampandi sól. Hann tekur mjög vel í sólinni í Ytri Rangá,“ sagði Jóhannes Hinriksson framkvæmdastjóri leigutaka í samtali við Sporðaköst. Þá voru fiskar að veiðast á svæðunum fyrir neðan og ber það vitni um að lax er í göngu. Þrír af þeim níu löxum sem veiddust voru smálaxar og er hann að mæta mjög snemma þetta árið.

Jóhann Hafnfjörð Rafnsson með lax úr veiðistaðnum Þorra í Víðidalsá. Ljósmynd/ES

Fjórir á fyrstu vakt í Víðidal

Í Víðidalsá og Fitjá var einnig byrjað að veiða í morgun. Veitt er á átta stangir og var fjórum löxum landað og nokkrir misstust. Fyrsta laxinn veiddist í Kerinu í Fitjá snemma í morgun. Þá veiddust tveir á neðsta svæðinu í veiðistaðnum Þorra. Fjórði fiskurinn veiddist í Ármótum. Flugurnar sem voru að gefa voru Black Brahan, Hitch, og Sunray.

Aðstæður í Víðidalnum er um margt erfiðar sérstaklega vegna vatnsleysi. Þó hafa rigningar síðustu daga aðeins lagað ástandið. Stærsti fiskurinn í morgun mældist 82 sentímetrar og voru hinir fiskarnir áþekkir.

Veiði hefst í Vatnsdalsá síðar í dag.

Elvar Örn Unnsteinsson tekst á við fallegan lax í Ármótum í morgun. Elvar Örn hafi betur en fiskurinn fékk frelsi á nýjan leik. Ljósmynd/Aðsend

• Blogga um frétt

Seinustu hundraðkallar sumarsins