Áður byrjað illa, en svo endað vel

Hallgrímur H. Gunnarsson með 92 cm grálúsuga hrygnu sem hann ...
Hallgrímur H. Gunnarsson með 92 cm grálúsuga hrygnu sem hann veiddi á dögunum í áramótum Þverár og Hvítá í Borgarfirði sem er einnig kölluð Brennan. Hrygnan stóra tók Green But nr. 12. Óttar Finnsson

Ljóst er að laxveiðitímabilið í bergvatnsánum í Borgarfirði í upphafi tímabilsins er án fordæma hvað vatnsleysi og litla laxagegnd varðar. Þó má hafa í huga að áður hefur veiði verið dræm í þessum ám í upphafi vertíðar en svo ræst úr svo um munar.

Sólríkir heiðskýrir dagar með úrkomuleysi og þrálátum norðanáttum hafa gert ástandið afskaplega erfitt þannig að í tveimur af bestu laxveiðiám landsins, Norðurá og Þverá/Kjarrá í Borgarfirði, hefur lítið veiðst fyrstu rúmu tvær vikur veiðitímabilsins.

Landssamband veiðifélaga minnti á það á vefsíðu sinni á fimmtudaginn að gott sé að hafa í huga að oft hefur laxveiði farið misvel af stað í gegnum árin en svo hafi ræst úr og nefndi dæmi um slíkt.

Sem dæmi um Þverá/Kjarrá má  nefna ađ árið 2006 þá höfðu aðeins veiðst 63 laxar á svipuðum tíma og núna. Lokatalan það árið varð hins vegar 2176 laxar.

Árið 2007 á höfðu einungis veiðst 14 laxar á svipuðum tíma og veiði fór ekki að glæðast fyrr en upp úr annarri viku júlí mánaðar og lokatalan það ár var 2435 laxar.

Til að setja þetta í betra samhengi þá var meðalveiði áranna frá 1974 til ársins 2008 í Þverá/Kjarrá 1959 laxar.

Varðandi Norðurá höfðu á svipuðum tíma árið 2007 veiðst 45 laxar en lokatalan það sumarið endaði í 1456 löxum sem er rétt undir meðalveiði sem er um 1570 laxar.

Á svipuðum tíma árið 2008 höfðu í Norðurá veiðst 68 laxar en veiðin endaði í alls 3307 löxum eða sem nemur 1737 löxum umfram meðalveiði.

Sendu ábendingu um frétt
eða myndir á veidi@mbl.is
mbl.is