Vikulegar veiðitölur

Aron Pálmarsson handboltamaður með maríulaxinn sinn, 100 cm hæng, sem ...
Aron Pálmarsson handboltamaður með maríulaxinn sinn, 100 cm hæng, sem hann fékk í Höfðahyl í Laxá í Aðaldal í morgun á sunray shadow túpu. Laxá/Nes

Viku­leg­ar veiðitöl­ur úr laxveiðiám lands­ins birt­ust í morg­un á vef Landssambands veiðifélaga og eru þær unnar fyrir vikuna 19. til 26. júní. Áberandi er að árnar sem ekki þjást af vatnsskorti eru efstar á þessum lista yfir mesta heildarveiði það sem af er.  Þá er áberandi hvað heildarveiðin í Norðurá og Þverá/Kjarrá er döpur.

Efst á listanum er Urriðafoss í Þjórsá þar sem er veiðin komin í 319 laxa og skilaði síðasta veiðivika 63 löxum. Veiðin á svipuðum tíma síðasta sumar var 391 lax og veiðin nú því heldur verri en þá.  Mikil sólbráð hefur verið í jöklinum að undanförnu sem hefur gert ána mjög litaða og segja veiðimenn að „sementslitur“ hafi verið í henni þegar verst hefur látið. 

Blanda er í öðru sæti með 110 laxa þar sem vikuveiðin var einnig 63 laxar, en á svipuðum tíma fyrir ári höfðu veiðst 175 laxar. Veiðin fer því aðeins hægar af stað nú í ár.   

Saman í þriðja sætinu eru Eystri-Rangá og Brennan í Hvítá í Borgarfirði með 93 laxa. Eystri-Rangá skilaði 82 löxum í síðustu viku sem er mun betra en á sama tíma fyrir ári þegar 17 laxar voru komnir á land. 

Brennan í Hvítá hefur gefið nánast sömu heildarveiði og á sama tíma í fyrra og segja menn að töluvert sé af laxi þar.  Það hefur samt haft áhrif á veiðina að jökullitað vatn hefur náð inn á svæðið sökum bágs vatnsbúskapar í Þverá/Kjarrá og því lítil skil á milli bergvatnsins og jökulvatnsins.

Nánar má kynna sér þessar upplýsingar hér.

Sendu ábendingu um frétt
eða myndir á veidi@mbl.is
mbl.is