Frábær morgun var á Nesveiðum í Laxá í Aðaldal í morgun. Sjö löxum var landað og einn misstur. Þetta er besti morgun í Nesi í sumar. Sérstaka athygli vakti að veiðikonan Lilla frá Bretlandi var að veiða með barnabarnabarni sínu, hinum ellefu ára gamla Drummond. Sjálf er Lilla 93ja ára gömul og hefur stundað Nesveiðar í 33 ár.
Drummond byrjaði veiði í morgun í Grástraumi og reisti fljótlega fisk. Eftir að hafa skipt oft um flugur tók laxinn loksins eftir um klukkutíma. Á sama tíma var langamma hans að kasta á Hólmavaðsstíflu, rétt fyrir ofan og setti í stórfisk. Bæði slógust við þessa stórfiska í tæpan hálftíma og lönduðu svo á sömu mínútu 96 og 89 sentímetra löxum.
Hrefna Hallgrímsdóttir lenti í ævintýrum í gærkvöldi þegar hún veiddi eftirlætisveiðistaðinn sinn Vitaðsgjafa. Leiðsögumaðurinn hennar var Ari Hermóður Jafetsson og eftir að hafa kastað nokkrum flugum yfirheitustu blettina. „Ég ákvað svo að setja undir Stífluna frá honum Nils Folmer. Fiskur bara negldi fluguna strax í öðru eða þriðja kasti og það var mjög fyndið þegar ég leit upp þá kom Nils keyrandi til okkar,“ sagði Hrefna í samtali við Sporðaköst í hádeginu.
Fiskinum var landað eftir rúmt kortér eftir mikinn atgang. Hrefna datt í ána þegar myndataka stóð yfir og varð rennandi blaut. Nils reif hana upp úr ánni og hjálpaði henni í land. Hrefna hló að öllu saman þó að hún væri köld. „Ég er löngu búin að ákveða að allir veiðitúrarnir mínir í sumar eru í Nes. Laxá er bara drottningin.“
Lengd á laxi | Veiðisvæði | Veiðimaður | Dagsetning Dags. |
---|---|---|---|
101 cm | Vatnsdalsá | Erlendur veiðimaður | 29. september 29.9. |
101 cm | Eystri-Rangá | Grzegorz Loszewski | 27. september 27.9. |
105 cm | Hvítá við Iðu | Katrín Tanja Davíðsdóttir | 24. september 24.9. |
101 cm | Víðidalsá | Jón Eðvald Halldórsson | 22. september 22.9. |
107 cm | Grímsá | Jón Jónsson | 22. september 22.9. |
101 cm | Miðfjarðará | Agnar Sigurjónsson | 22. september 22.9. |
101 cm | Hvítá við Iðu | Gunnar Pétursson | 20. september 20.9. |