Cezary Fijalkowski er lesendum Sporðakasta að góðu kunnur. Hann er magnaður veiðimaður og meðal annars þekktur fyrir góð aflabrögð í stórurriðanum í Þingvallavatni þar sem hann stundar veiðar í þjóðgarðinum. Cezary sendi okkur skýrslu eftir annan veiðitúrinn í Eystri Rangá í sumar. Í fyrri túrnum sem hann fór í byrjun júlí landaði hann tíu stórlöxum. Allir á bilinu 85 til 95 sentímetrar. Allir voru þeir teknir á Sunray afbrigði.
„Meginmarkmiðið með þessum ferðum var að prófa nýju tvíhendurnar frá Sage. Stangirnar, Sage X og Igniter með nýjum línum frá Rio og Sage Spectrum Max hjóli. Þarna er mikið og stórt vatnsfall og risafiskar. Algert himnaríki fyrir tvíhenduna,“ sagði Cezary í samtali við Sporðaköst.
Seinni ferðin hans í Eystri Rangá var um síðustu helgi. „Þetta var bara veisla. Áin er full af fiski á bilinu sextíu til hundrað sentímetrar plús og við veiddum ótrúlega vel alla dagana.“
Cezary missti nokkra laxa sem hann segir að hafi verið í flokknum XXL og einnig sá hann fleiri slíka. Flugurnar sem voru að gefa honum best voru Skuggi, lítil rauð Frances með kúluhaus og Sunray afbrigði sem hann kallar Sunray Shadow Eystri.
„Ég var mjög ánægður með stangirnar og fékk allar aðstæður sem maður vill þegar verið er að prófa nýjar græjur. Ef ég ætti að velja mér tvíhendu þá væri það alltaf Sage Igniter. Mögnuð í vindi og í stórum fiski. Ég elska Eystri og það er ekkert betra en að setja í stóran lax í miklu vatni.“
Það sést best í tölum frá Landssambandi veiðifélaga að veisla hefur verið í Eystri Rangá. En síðasta vika skilaði rétt tæplega 500 laxa veiði og ber áin höfuð og herðar yfir aðrar ár á landinu í augnablikinu með ríflega 1100 laxa. Búast má við áframhaldandi fjöri fyrir austan.
Lengd á laxi | Veiðisvæði | Veiðimaður | Dagsetning Dags. |
---|---|---|---|
101 cm | Vatnsdalsá | Erlendur veiðimaður | 29. september 29.9. |
101 cm | Eystri-Rangá | Grzegorz Loszewski | 27. september 27.9. |
105 cm | Hvítá við Iðu | Katrín Tanja Davíðsdóttir | 24. september 24.9. |
101 cm | Víðidalsá | Jón Eðvald Halldórsson | 22. september 22.9. |
107 cm | Grímsá | Jón Jónsson | 22. september 22.9. |
101 cm | Miðfjarðará | Agnar Sigurjónsson | 22. september 22.9. |
101 cm | Hvítá við Iðu | Gunnar Pétursson | 20. september 20.9. |