Í því árferði sem nú ríkir í laxveiðinni vestanlands er hver fiskur afar dýrmætur og allt að því sigur. Skúli Kristinsson leiðsögumaður í Laxá í Kjós og víðar lenti í því í vikunni að hann var búinn að vera með veiðimann í tvo daga án þess að snerta fisk. Svo gerðist það í Álabökkum að þeir settu í einn. Veiðimaðurinn spilaði fiskinn í nokkurn tíma og svo skyndilega stökk þessi líka fiskurinn.
„Ohhhhhhhh,“ sagði Skúli í samtali við Sporðaköst þegar hann var spurður út í myndbandið. „Maður veit aldrei hvað er á hinum endanum í þessum veiðistað. Og við þessar aðstæður er hver fiskur svo dýrmætur. Að maður tali nú ekki um þegar sett er í svona fisk.“
Skúli metur það sem svo að þetta hafi verið um það bil níu kílóa fiskur.
„Hann kom bara upp og negldi Pheasant Tail númer sextán, óþyngda. Við vorum með þurrflugu og Pheasant Tail aftan í. Eftir að þessu var lokið kastaði hann aftur og þá kom sextíu sentímetra smálax og negldi þurrfluguna. Honum lönduðum við.“
Þeir voru að nota mjög nettar græjur enda þýðir lítið annað við þessar aðstæður.
„Um leið og laxinn lenti þá kubbaðist taumurinn í sundur, hann var með átta pund taum og þegar svona skepna stekkur þá áttu lítinn séns.“
Hvernig er geðheilsan í þessu sumri?
„Ahhhhh við skulum bara orða það þannig að það eru góðir dagar og slæmir dagar. Maður er náttúrulega hálf bugaður eftir tvo daga með tvær stangir og ekki búnir að snerta fisk. Svo á móti kemur að þegar menn setja í fisk þá er svo þungu fargi af manni létt. En heilt yfir er þetta gaman þó að þetta sé erfitt sumar.“
Lengd á laxi | Veiðisvæði | Veiðimaður | Dagsetning Dags. |
---|---|---|---|
101 cm | Vatnsdalsá | Erlendur veiðimaður | 29. september 29.9. |
101 cm | Eystri-Rangá | Grzegorz Loszewski | 27. september 27.9. |
105 cm | Hvítá við Iðu | Katrín Tanja Davíðsdóttir | 24. september 24.9. |
101 cm | Víðidalsá | Jón Eðvald Halldórsson | 22. september 22.9. |
107 cm | Grímsá | Jón Jónsson | 22. september 22.9. |
101 cm | Miðfjarðará | Agnar Sigurjónsson | 22. september 22.9. |
101 cm | Hvítá við Iðu | Gunnar Pétursson | 20. september 20.9. |