Stærsti lax sumarsins kom á land í Ytri Rangá í morgun og landaði sami veiðimaður að auki risasjóbirtingi á sömu vaktinni.
Það var Axel Wimmer sem setti í stórlaxinn á svokölluðum Rangárflúðum og eftir langa baráttu var 104 cm hæng landað í kvíslinni við hliðina á. Tók sá stóri rauðan Frigga. Fyrr um morguninn hafði Axel landað 90 cm sjóbirtingi í Línustreng sem tók litla Froden túpu.
Þetta er þó ekki stærsti sjóbirtingurinn sem veiðst hefur þar í sumar því þann 12. júlí fékk Einar Falur Ingólfsson ljósmyndari einn 94 cm langan einnig í Línustreng á Sunray túpu.
Fyrir nokkrum árum tóku leigutakar upp sleppiskyldu á sjóbirtingi og hafa menn veitt því athygli að mun meira er nú af stórum birtingum en áður sem ganga aftur og aftur í ána.
Laxveiðin í Ytri Rangá hefur verið heldur rísandi að undanförnu og eru rúmlega þúsund laxar komnir á land í heildina, en í síðustu viku veiddust þar 217 laxar. Heildarveiðin hefur oft verið betri í Ytri Rangá og á hún nokkuð langt í að ná nágrönnu sinni í Eystri Rangá sem er komin í nálægt 2500 laxa.
Lengd á laxi | Veiðisvæði | Veiðimaður | Dagsetning Dags. |
---|---|---|---|
101 cm | Vatnsdalsá | Erlendur veiðimaður | 29. september 29.9. |
101 cm | Eystri-Rangá | Grzegorz Loszewski | 27. september 27.9. |
105 cm | Hvítá við Iðu | Katrín Tanja Davíðsdóttir | 24. september 24.9. |
101 cm | Víðidalsá | Jón Eðvald Halldórsson | 22. september 22.9. |
107 cm | Grímsá | Jón Jónsson | 22. september 22.9. |
101 cm | Miðfjarðará | Agnar Sigurjónsson | 22. september 22.9. |
101 cm | Hvítá við Iðu | Gunnar Pétursson | 20. september 20.9. |