Karólína Ósk Rafnsdóttir er sjö ára gömul og 120 sentímetrar á hæð. Hún er mikil veiðiáhugamanneskja og fór í vikunni með pabba sínum, Rafni Alfreðssyni að veiða og markmiðið var að setja í fallega bleikju. Pabbi hennar leigir Miðfjarðará og voru því heimatökin hæg. Farið var með Karólínu í hyl sem heitir hornið og þar er bleikja en reyndar einnig lax.
Hún á sjö feta flugustöng fyrir línu fimm og er orðin býsna flink með hana. Þau feðgin fóru i Horn og Karólína kastaði fyrst en stífur vindur gerði það að verkum að hún náði ekki nægilega langt út. Hún bað pabba að kasta fyrir sig. Hann gerði það og rétti henni stöngina. Hún strippaði rólega og skyndilega var rifið í línuna og átökin voru mikil. „Pabbi, pabbi þetta er risafiskur.“
Rafn var ekki alveg sannfærður en svo stökk hann. Rafn sagði í samtali við Sporðaköst að hann hefði sopið hveljur þegar hann sá dýrið. «Ég sagði við hana. Þetta er tveggja ára fiskur. Hún leit á mig og sagði ákveðin. Nei. Þetta er stórlax. Pabbi, þetta er stórlax.» og það reyndist svo sannarlega rétt hjá þeirri stuttu. Eftir 25 mínútna viðureignar þar sem þau feðgin skiptust á að glíma við fiskinn lönduðu þau saman 97 sentímetra laxi. „Pabbi. Þetta er stórlax.“ Já sagði stoltur faðir.
„Vesenið byrjaði hins vegar þegar við ætluðum að sleppa fiskinum. Ég var á strigaskónum og hún á litlum bleikum stígvélum og við vorum í vandræðum að koma honum í súrefnisríkt vatn. Það endaði með því að ég varð að fara úr sokkum og skóm til að komast út með hann. Þar slepptum við stórlaxinum og allir voru sáttir,“ sagði Rabbi brosandi.
Lengd á laxi | Veiðisvæði | Veiðimaður | Dagsetning Dags. |
---|---|---|---|
101 cm | Vatnsdalsá | Erlendur veiðimaður | 29. september 29.9. |
101 cm | Eystri-Rangá | Grzegorz Loszewski | 27. september 27.9. |
105 cm | Hvítá við Iðu | Katrín Tanja Davíðsdóttir | 24. september 24.9. |
101 cm | Víðidalsá | Jón Eðvald Halldórsson | 22. september 22.9. |
107 cm | Grímsá | Jón Jónsson | 22. september 22.9. |
101 cm | Miðfjarðará | Agnar Sigurjónsson | 22. september 22.9. |
101 cm | Hvítá við Iðu | Gunnar Pétursson | 20. september 20.9. |