Selá í Vopnafirði er ein af örfáum ám á landinu sem eru komnar með meiri veiði í sumar en allt árið í fyrra. Þetta er enn ein staðfestingin á því hversu norðausturhornið hefur verið sterkt í samanburði við aðra landshluta þegar horft er til laxveiði. Landssamband veiðifélaga birti vikulegar veiðitölur í morgun á vef sínum angling.is. Þar eru engar stórar fréttir á ferðinni. Haustið er komið og dregur nú í rólegheitum úr veiðinni þó að enn kunni að koma skot hér og þar.
Sem fyrr er Eystri-Rangá efst á listanum en hafði í morgun ekki skilað inn tölum fyrir síðustu viku. Selá er í öðru sæti með 1.391 lax og var vikuveiðin þar 91 fiskur. Lokatalan í Selá í fyrra var 1.340 laxar.
Í þriðja sæti er Ytri-Rangá og var heildarveiði þar í síðustu viku 180 laxar, en maðkaopnun kemur þar til að hluta. Ytri-Rangá er komin í 1.364 laxa. Miðfjarðará er í fjórða sæti og hefur listinn lítið breyst.
Athygli vekur að Laxá á Ásum er komin í 682 laxa en heildarveiðin í fyrra var 702. Þá er Hofsá í Vopnafirði komin í 620 laxa en endaði í fyrra með 697.
Svalbarðsá fellur í flokk með Selá og er komin yfir heildarveiði síðasta árs, en Svalbarðsá hefur verið lífleg í sumar. Sama má segja um Deildará og neðri hluta Skjálfandafljóts, en bæði veiðisvæðin eru komin yfir heildarveiði síðasta árs.
Árnar á suðvesturlandi hafa tekið nokkurn kipp eftir að fór að rigna en það er of lítið og of seint. Ljóst er að veiði ársins 2019 í mörgum þessara áa verður viðmiðið í framtíðinni fyrir lélegasta sumar frá því að skráningar hófust.
Lengd á laxi | Veiðisvæði | Veiðimaður | Dagsetning Dags. |
---|---|---|---|
101 cm | Vatnsdalsá | Erlendur veiðimaður | 29. september 29.9. |
101 cm | Eystri-Rangá | Grzegorz Loszewski | 27. september 27.9. |
105 cm | Hvítá við Iðu | Katrín Tanja Davíðsdóttir | 24. september 24.9. |
101 cm | Víðidalsá | Jón Eðvald Halldórsson | 22. september 22.9. |
107 cm | Grímsá | Jón Jónsson | 22. september 22.9. |
101 cm | Miðfjarðará | Agnar Sigurjónsson | 22. september 22.9. |
101 cm | Hvítá við Iðu | Gunnar Pétursson | 20. september 20.9. |