Lentu í ævintýralegu moki í Tungulæk

Teddi með flottan birting úr Tungulæk. Þeir félagar eru búnir …
Teddi með flottan birting úr Tungulæk. Þeir félagar eru búnir að vera í ævintýralegri veiði. Ljósmynd/Aðsend

Theodór K. Erlingsson og Hafþór Hallsson félagi hans eru búnir að vera í ævintýralegu moki í Tungulæk frá því að þeir hófu veiði á hádegi á föstudag. Það er greinilegt að mjög mikið er af fiski í læknum og hann er að taka.

„Þetta er búið að vera rosalegt. Við erum að setja í hann í nánast hverju kasti,“ sagði Teddi í samtali við Sporðaköst í gærkvöldi. „Þetta er mest neðarlega og nálægt ósnum en samt er bara fiskur um allt. Veðrið er helsti áhrifavaldurinn í þessu en við erum ýmsu vanir að vestan,“ hlær Teddi sem á ættir að rekja til Vestfjarða.

Þetta er algeng sjón í Tungulæk.
Þetta er algeng sjón í Tungulæk. Ljósmynd/Teddi

„Þetta snýst ekki um veðrið. Þetta snýst um hugarfar. Ef þú vilt vera að spá í hversu kalt er þá ferðu bara upp í hús að grenja,“ sagði Teddi og hló. Hann viðurkennir að það þurfi að hafa vettlinga til skiptanna. „Ef þú ert með blauta vettlinga er þetta búið.“

Á fyrri vaktinni, sem var seinnipart föstudags, fengu þeir félagar 48 sjóbirtinga. Í gær lönduðu þeir samtals 46 þannig að þetta er búið að vera algert ævintýri hjá þeim.

Enn einn birtingurinn dreginn á land. Öllum fiski er sleppt …
Enn einn birtingurinn dreginn á land. Öllum fiski er sleppt í Tungulæk. Ljósmynd/Teddi

Í hvaða standi er fiskurinn?

„Hann er bara ótrúlega flottur. Auðvitað eru slápar innan um en við erum mest að setja í 75 til 80 sentímetra fiska. Hér áður var algengt að mikið væri af 40 sentímetra puttum en við verðum lítið varir við þá.

Ég er búinn að veiða hérna í tólf ár í beit og þetta vor lítur einstaklega vel út,“ sagði Teddi í samtali við Sporðaköst í gærkvöldi.

Þeir eru að veiða þungt félagarnir og það eru sökktaumar og keilur sem gefa veiðina.

Þeir félagar hugsa sér gott til glóðarinnar í dag og ætla að fara á fullt í birtinginn. Þeir eru komnir með 94 fiska og langar að ná hundrað.

Uppfært

Eins Tungulækurinn var veiðilegur í gær þá blasti við allt önnur mynd í morgunsárið. Þessa mynd tók Teddi þegar aðstæður voru skoðaðar í morgun. Þetta er Réttarhylur og hann var einfaldlega lokaður af krapa og snjó.

Gerbreytt staða blasti við veiðimönnum í morgun í Tungulæk.
Gerbreytt staða blasti við veiðimönnum í morgun í Tungulæk. Ljósmynd/Teddi
mbl.is

Seinustu hundraðkallar sumarsins

Lengd á laxi Veiðisvæði Veiðimaður Dagsetning Dags.
104 cm Nesveiðar Hugo 29. júní 29.6.
104 cm Nesveiðar Aron Pálmarsson 27. júní 27.6.
107 cm Nesveiðar Hilmar Hafsteinsson 25. júní 25.6.
101,5 cm Laxá í Kjós Guðjón Þ. Guðjónsson 23. júní 23.6.
101 cm Blanda Pétur Pálsson 21. júní 21.6.
101 cm Víðidalsá James Murray 20. júní 20.6.

Skoða meira