Grásleppan gefur góð fyrirheit um laxinn

Grásleppa skorin hjá GPG fiskverkun. Nú hefur veiðin á henni …
Grásleppa skorin hjá GPG fiskverkun. Nú hefur veiðin á henni verið góð. Hún er uppsjávarfiskur eins og laxinn og heldur sig á svipuðum slóðum. mbl.is/Hafþór

Góð grásleppuveiði sem verið hefur í vor er af mörgum talið skýrt merki um að laxveiðin verði góð í sumar. Margir veiðimenn trúa því að grásleppuveiði gefi fyrirheit um þann silfraða. Sporðaköst leituðu til Hafrannsóknastofnunar með þessa kenningu.

Guðni Guðbergsson sviðsstjóri hjá stofnuninni varð fyrir svörum. „Það getur margt verið til í samhengi milli afkomu grásleppu og afkomu laxa. Báðar tegundir eru uppsjávartegundir og í svipaðri vist. Það felst þá í aukinni fæðu og vexti þar með minni afföllum. Ég er ekki viss um að þessar vísbendingar standist tölfræðilega en það þyrfti að skoða betur,“ sagði Guðni í skriflegu svari við spurningu Sporðakasta.

Samkvæmt hefðinni er ekki langt í að fyrstu laxarnir láti sjá sig í ám á Suður- og Vesturlandi. Oftar en ekki eru menn að sjá þá fyrstu upp úr miðjum maí. Hvenær svo sem þeir fyrstu ganga er ljóst að þeir eru á heimleið. 

mbl.is