Fyrstu sjóbirtingarnir og sjóbleikjurnar veiddust á Ósasvæði Hítarár í dag. Gunnar Sigurðsson og Guðmundur Jóhannsson sáu töluvert magn af fiski. Þeir settu í tólf en lönduðu bara fjórum.
„Við byrjuðum að veiða um klukkan sjö í morgun, það var aðeins farið að falla út þannig að það hefði verið betra að byrja aðeins fyrr. En við sáum töluvert af fiski og þá sérstaklega sjóbleikju og þar af var ein myndarleg torfa,“ sagði Gunnar í samtali við Sporðaköst þegar þeir hættu veiðum síðdegis.
Þeir lönduðu tveimur birtingum og tveimur bleikjum. „Ég var með of grannan taum og við vorum að missa þessa sterku birtinga. En ég hef ekki veitt þarna fyrr og þetta var hálfgerð tilraunaveiði hjá okkur á þessu svæði en það lítur mjög vel út. Þetta var mjög skemmtilegt og mikið af fiski.“
Veiðin var mest að koma á púpur en þó tók einn sjóbirtingurinn rauðan Frances. Engjaflugan, Gulltoppur og fleiri flugur vöktu athygli bæði bleikju og birtings.
Eins og við greindum frá í gær er þetta svæði nú loksins orðið aðgengilegt eftir að vegur var lagður að svæðinu. Óheimilt er að keyra með ánni og ber veiðimönnum að leggja bílum sínum við salernisaðstöðu sem reist hefur verið miðsvæðis. Tvær stangir eru á svæðinu og það er um fimm kílómetra langt.
Ekki er kvóti á bleikjunni eða sjóbirtingnum en sömu reglur gilda um lax sem veiðist á Ósasvæðinu eins og í sjálfri Hítaránni.
Lengd á laxi | Veiðisvæði | Veiðimaður | Dagsetning Dags. |
---|---|---|---|
101 cm | Vatnsdalsá | Erlendur veiðimaður | 29. september 29.9. |
101 cm | Eystri-Rangá | Grzegorz Loszewski | 27. september 27.9. |
105 cm | Hvítá við Iðu | Katrín Tanja Davíðsdóttir | 24. september 24.9. |
101 cm | Víðidalsá | Jón Eðvald Halldórsson | 22. september 22.9. |
107 cm | Grímsá | Jón Jónsson | 22. september 22.9. |
101 cm | Miðfjarðará | Agnar Sigurjónsson | 22. september 22.9. |
101 cm | Hvítá við Iðu | Gunnar Pétursson | 20. september 20.9. |