Laxinn mættur í borgina - myndband

Laxinn er mættur í Elliðaárnar. Ásgeir Heiðar, veiðimaður sem þekkir árnar inn og út, sá tvo laxa í Sjávarfossi í morgun. Hann hafði þegar samband við skrifstofu Stangaveiðifélags Reykjavíkur og greindi frá þessu. Sölustjóri SVFR, Brynjar Þór Hreggviðsson, mætti á staðinn í framhaldi af þessu og það leynir sér ekki að þarna er laxinn mættur.

Ásgeir Heiðar sagði í samtali við Sporðaköst að hann teldi að laxinn hefði komið degi seinna í fyrra en hér á árum áðum var þetta töluvert síðar, eða í kringum 7. júní. 

Það er alltaf hátíðlegt þegar fyrstu laxarnir sjást í borgarperlunni og má kannski segja að það sé í takt við það sem var að gerast í fyrra. Óvenjumikið veiddist af stórum tveggja ára löxum en það eru jú þeir sem koma fyrstir.

Nú verður breyting á í veiðiskap í Elliðaánum en einungis er leyft að veiða á flugu og eru það mikil viðbrigði fyrir marga sem hafa stundað veiði í ánum. Þessi ákvörðun var kynnt í fyrra og markmiðið er að viðhalda og vernda stofn Elliðaánna.

• Blogga um frétt

Seinustu hundraðkallar sumarsins