„Ég hef aldrei séð svona lax á Íslandi“

Ingólfur Davíð með hrygnuna spengilegu sem hann náði á Fossbrotinu …
Ingólfur Davíð með hrygnuna spengilegu sem hann náði á Fossbrotinu í Sandá. Hún tók fluguna Colburn Special og allir fimmtán fiskarnir sem veiddust í opnunarhollinu koma á smáflugur og hitch. Ljósmynd/Aðsend

Ein besta opnun í manna minnum var í Sandá í Þistilfirði í  vikunni. Opnunarhollið hóf veiði þann 24. og lauk í gær. Samtals veiddust fimmtán laxar og er það án efa ein besta opnun í Sandá í háa herrans tíð. Einn af þeim sem voru í opnunarhollinu var stórlaxahvíslarinn Ingólfur Davíð Sigurðsson. Hann hefur handfjatlað marga risalaxa, bæði á Íslandi, í Noregi og Rússlandi.

„Þetta var algerlega frábær túr. Ég hef fylgst með Þistlunum í áratugi og man ekki eftir svona kröftugri opnun,“ sagði Ingólfur Davíð í samtali við Sporðaköst, nýkominn heim eftir Sandárævintýr.

„Þetta er áin. Við lönduðum fimmtán löxum og allir voru yfir áttatíu sentímetra. Sá stærsti var 98 sentímetrar og tók á Fossbrotinu. Ég fékk líka 96 sentímetra hrygnu sem ég hélt lengi vel að væri lax lífs míns. Ég sá ekki fram á að geta landað þessum svakalega fiski. Svo fór hrygnan að sýna takta og þá fljótlega áttaði ég mig á að þetta var hængurinn sem fylgdi henni. Ég hef aldrei séð svona lax á Íslandi. Hann er aldrei undir þrjátíu pundum. Aldrei,“ sagði Ingólfur Davíð.

Erna Þorsteinsdóttir, kona Ingólfs með glæsilegan fisk úr Efri þriggja …
Erna Þorsteinsdóttir, kona Ingólfs með glæsilegan fisk úr Efri þriggja laxa hyl í Sandá. Ljósmynd/Aðsend

Þótt veiðimenn tali oft um stóra fiska sem þeir sjá og telja svo og svo stóra, þá er Ingólfur með þannig reynslu þegar kemur að stórlöxum að á hann verður að hlusta. Hann hefur fengið þrjátíupundara í Vatnsdalsá svo eitthvað sé nefnt og veitt stórlaxa í bæði Noregi og Rússlandi.

„Ástandið á fiskinum er ævintýralegt. Ég hef ekki áður séð svona mikið af vel höldnum tveggja ára fiski. Þeir eru hnöttóttir.“

Nánast allir laxarnir veiddust á efsta svæðinu. Einungis einn kom af neðsta svæðinu og veiddist hann í Hornhyl, sem er klassískur vorstaður. Annars voru Steinabreiða, Efri þriggja laxa, Ólafshylur, Húshylur og Fossbrot að gefa.

Varðandi stórfiskinn segir Ingólfur að fleiri eigi eftir að sjá hann. Hængurinn liggur á Fossbroti og hefur hreinsað allt þar í burtu. Enginn fiskur á möguleika á að liggja nærri honum. „Hann verður þarna áfram nema komi til þess að hann verði leiður á athyglinni. Þá skríður hann inn í Foss.“

Þessi kraftmikla opnun hlýtur að gleðja félaga í Stangaveiðifélagi Reykjavíkur, sem formlega tekur ána á leigu næsta sumar, og lýkur þá áratugalöngu viðskiptasambandi Þistla og bænda í Þistilfirði.

mbl.is

Seinustu hundraðkallar sumarsins

Lengd á laxi Veiðisvæði Veiðimaður Dagsetning Dags.
103 cm Selá í Vopnafirði Erlendur veiðimaður 14. júlí 14.7.
102 cm Laxá í Aðaldal Páll Ágúst Ólafsson 13. júlí 13.7.
104 cm Laxá í Aðaldal Aðalsteinn Jóhannsson 8. júlí 8.7.
100 cm Hólsá, Eystri-bakki Ben Sangster 6. júlí 6.7.
100 cm Blanda Neil Boyd 6. júlí 6.7.
100 cm Hólsá, Eystri-bakki Gijs K. Sipestein 6. júlí 6.7.
102 cm Jökla Nils Folmer Jörgensen 4. júlí 4.7.

Skoða meira