Topp tíu listinn í laxveiðinni

Það er tvennt sem stendur upp úr þegar nýjar veiðitölur fyrir liðna viku eru skoðaðar. Eystri Rangá er á miklu flugi og veiðin þar er ótrúleg miðað við fyrri hluta júlí.

Margar ár á Vesturlandi eru ekki að skila því sem þær ættu að vera að gera. Þegar horft er til fjölda fiska sem sést hafa í þessum ám þá eru veiðitölur ekki að endurspegla það magn.

Vatnsdalsá, Víðidalsá, Miðfjarðará, Norðurá, Langá og jafnvel Elliðaár eru að fá mun meira af fiski en í fyrra og jafnvel oft áður. Þannig var teljarinn í Elliðaánum í meira en átta hundruð fiskum á mánudag en fyrir réttu ári voru þeir 355 talsins. Hins vegar er léleg taka í öllum þessum ám og þær hljóta margar að eiga mikið inni. 

Vestanáttir segja sumir, aðrir hreinlega skilja ekki stöðuna en allir eru sammála um að þessar ár eiga inni.

Veiði í Eystri Rangá er mun betri en menn eiga að venjast þar á þessum tíma júlí. Nú er svo komið að veiðin er á pari við það sem gerist á „prime time“ eða besta tíma. En sá tími hefst venjulega um 20. júlí. Ríflega fimm hundruð laxar veiddust í nýliðinni viku og stekkur Eystri í toppsætið á lista Landssambands veiðifélaga á angling.is. Annars er listinn þessi yfir tíu aflahæstu árnar:

Eystri Rangá                  667

Urriðafoss                     589

Norðurá                        404

Ytri Rangá                     328

Þverá/Kjarrá                 275

Haffjarðará                   217

Miðfjarðará                   177

Langá                           153

Laxá í Kjós                    136

Laxá á Ásum                 131

Í ellefta sæti er Hofsá í Vopnafirði með 103 laxa. Það er mjög spennandi í Hofsá sem telst öflug síðsumars á. 

• Blogga um frétt

Seinustu hundraðkallar sumarsins