Þess vegna notum við alltaf gleraugu

Einn af reyndari leiðsögumönnum í laxveiði á Íslandi lenti í óhappi í Laxá í Dölum í gær, Hann var með viðskiptavin í leiðsögn í Höskuldsstaðastrengjum og voru þeir staddir á mið pallinum, fyrir þá sem eru kunnugir. Skyndilega fær Stefán Sigurðsson fast högg í andlitið og áttaði sig ekki strax á hvað hafði gerst. En eins og myndirnar bera með sér small þríkrókur í andlitið á honum, ekki langt frá auganu.

„Já mér brá og þetta var sárt í smá tíma svo dofnaði þetta. Ég lít á þeta sem góða áminningu um að vera alltaf með gleraugu. Ég var með gleraugu og ef krókurinn hefði farið tveimur til þremur sentímetrum hærra, þá gæti hann hafa farið í augað. Það er út af þessum slysum sem við notum alltaf gleraugu í fluguveiði,“ sagði Stefán í samtali við Sporðaköst.

Stefán var með gleraugu þegar atvikið átti sér stað. Ekki gerst áður á tæplega þrjátíu ára ferli hjá honum. Ljósmynd/Aðsend

„Ég hef ekki lent í þessu fyrr á tæplega þrjátíu ára ferli sem veiðimaður og leiðsögumaður. Oft fengið flugu frá veiðimönnum í jakkann eða húfu en aldrei fyrr í andlit. Maður lærir að lesa hreyfingar veiðimanna eins og markvörður í íshokkí. En þessi náði mér,“ hlær Stefán.

Okkar maður, Stefán Sigurðsson klár í slaginn. Plástur og allir góðir. Gleraugun á sínum stað. Ljósmynd/Aðsend

Og hvernig gekk að ná þríkróknum úr?

„Ég togaði bara fast í tauminn svo agnhaldið kæmi út. Svo náðum við í töng, rafmagnsbít og klipptum agnhaldið af og drógum hann svo í gegn. Þessu lauk með sótthreinsun og plástri.“ Þetta var ekki mikið að trufla Stefán þegar Sporðaköst hittu hann í dag. Hann hins vegar ítrekar að vera alltaf með gleraugu. Alltaf.

• Blogga um frétt

Seinustu hundraðkallar sumarsins