„Þessi minning er mér svo ljóslifandi því í „gamla daga“ þótti ekki mjög fínt að veiða á Frances. Hún þótti jafnvel ekki fluga og til voru þeir sem vildu banna hana því hún veiddi svo vel.

Hvers vegna veiða Frances og Sunray túpurnar svo vel? Kannski er það vegna þess að þær líkja eftir æti laxa úr sjó. Það er að minnsta kosti mín kenning. Sunray með löngum væng sem dregin er hratt minnir laxinn á sandsíli og Frances flugan á rækju,“ segir Ólafur í samtali við Sporðaköst.

"Upphaf Frances flugunnar má rekja til ensku flugunnar Black Eyed Prawn sem Peter Dean gerði eftir pöntun en hann var beðinn um að hnýta rækjueftirlíkingu.

Black Eyed Prawn var líkari rækju en Frances flugan sem við þekkjum í dag. Black Eyed Prawn kom fyrst fram á sjónarsviðið 1964 og hefur þróast og breyst í áranna rás. Líkt og með Sunray er réttara að tala um flugufjölskyldu en flugu þegar rætt er um Frances. Jafnvel stórfjölskyldu.

Frances er í dag hnýtt sem hefðbundin fluga, gjarnan á þríkrækju í mörgum stærðum, allt niður í #18. Ýmis form af túpuútfærslum eru hnýtt og vinsælust eru líklega keilutúpurnar. Nú síðast kom fram á sjónarsviðið Frances hnýtt á þríkrækju, léttþyngd með kúlu en sú útfærsla hefur veitt ótrúlega vel. Þá er Frances flugan hnýtt í fjölmörgum litum í dag. Rauður og svartur hafa verið vinsælustu litir í mörg ár en aðrir litir sem hafa náð vinsældum eru meðal annars ólífugrænn, kóngablár, hvítur og nú síðustu misserin bleikur og magenta.“