Lítið af bleikju en þær stóru eru mættar

Benjamín Þorri Bergsson með stórbleikjuna sem hann veiddi í morgun …
Benjamín Þorri Bergsson með stórbleikjuna sem hann veiddi í morgun á Krókinn númer 10. Hún mældist 70 sentimetrar. Ljósmynd/Aðsend

Margir hafa af því verulegar áhyggjur hversu lítið er gengið af sjóbleikju í bleikjuárnar fyrir norðan. Sú sem er hvað þekktust af þeim er Eyjafjarðará og þar hefur lítið gengið af bleikjunni enn sem komið er. Jón Gunnar Benjamínsson sem er stjórnarmaður í Veiðifélagi Eyjafjarðarár segir þetta áhyggjuefni. „Það sem er komið er allt mjög stór og flott bleikja en það vantar alveg minni fiskinn. Við höfum ekkert séð af þessum punds til þriggja punda bleikjum sem eiga að vera komnar á þessum tíma,“ sagði Jón Gunnar í samtali við Sporðaköst.

Gleðin er ósvikin enda stærsta bleikjan hans á ferlinum.
Gleðin er ósvikin enda stærsta bleikjan hans á ferlinum. Ljósmynd/Aðsend

Hann segist ekki muna eftir sambærilegri stöðu áður fyrr. Fram undan er stækkandi straumur og þá standa vonir til þess að göngur aukist. Jón Gunnar segist hafa heyrt af góðu skoti, af sjóbleikju neðst í Fnjóská en að öðru leyti virðist sama staða í flestum ánum.

Þó gerast enn ævintýri í Eyjafjarðará og eitt slíkt átti sér stað í morgun. Jón Gunnar og frændi hans Benjamín Þorri Bergsson skruppu til veiða upp á fimmta svæði í Eyjafjarðará. Þar setti Benjamín í sína stærstu bleikju og landaði sjötíu sentimetra hæng. Þessi fiskur tók Krókinn númer 10. Benjamín er fjórtán ára gamall en með mikla reynslu þrátt fyrir ungan aldur. Stærsta bleikjan hans fram til þessa var 69 sentimetrar en ekki eins þykk og sú í morgun. Hann var afskaplega kátur með morguninn, en þetta var eini fiskurinn á vaktinni.

mbl.is

Seinustu hundraðkallar sumarsins

Lengd á laxi Veiðisvæði Veiðimaður Dagsetning Dags.
101 cm Vatnsdalsá Erlendur veiðimaður 29. september 29.9.
101 cm Eystri-Rangá Grzegorz Loszewski 27. september 27.9.
105 cm Hvítá við Iðu Katrín Tanja Davíðsdóttir 24. september 24.9.
101 cm Víðidalsá Jón Eðvald Halldórsson 22. september 22.9.
107 cm Grímsá Jón Jónsson 22. september 22.9.
101 cm Miðfjarðará Agnar Sigurjónsson 22. september 22.9.
101 cm Hvítá við Iðu Gunnar Pétursson 20. september 20.9.

Skoða meira

Fleira áhugavert
Fleira áhugavert