„Þetta var mjög skemmtilegt. Ég er svo glaður að þetta skyldi vera fiskur úr Fnjóská og svona stór. Hann fer í klak og mun hjálpa ánni í framtíðinni,“ sagði Gunnar Jónsson á Akureyri um 100 sentímetra laxinn sem hann landaði í Fnjóská í vikunni.
Gunnar var einn þegar hann setti í laxinn. „Hann vildi koma í klak. Hann bara kom rólega að Francesnum og tók hana og lagðist svo bara. Ég var með fast átak honum allan tímann en hann hreyfðist ekki. Ég var að reyna að hringja í félaga mína að koma með háf og plastslöngu svo við gætum farið með hann í klakkistu.“ Gunnar segir að hann hafi ekki náð í þá fyrr en eftir fimmtán mínútur og þá voru þeir fljótir á staðinn. Viðureignin tók um hálftíma og þessi stórlax er nú í kistu og býður þess að verða kreistur í haust.
Gunnar hefur áður fengið stærri lax í Fnjóská. það var í Ferjupolli og mældist hann 102 sentímetrar. Þessi í vikunni mældist sléttir hundrað sentímetrar og tók rauða Frances tommu.
„Ég fer bara eftir kvarðanum. Hundrað sentímetrar eru tíu kíló eða tuttugu pund. Sá úr Ferjupolli var samkvæmt því 22 pund,“ segir Gunnar um áætlaða þyngd þessara stórlaxa. Hann hefur reyndar fengið einn enn og var það í Laxá í Aðaldal.
Hundraðkallinn hans Gunnars veiddist á Merkurbreiðu á svæði 4. Laxinn var leginn og því líklega gengið í ána snemma í júní. Ríflega hundrað laxar eru komnir úr Fnjóská í sumar.
Lengd á laxi | Veiðisvæði | Veiðimaður | Dagsetning Dags. |
---|---|---|---|
101 cm | Vatnsdalsá | Erlendur veiðimaður | 29. september 29.9. |
101 cm | Eystri-Rangá | Grzegorz Loszewski | 27. september 27.9. |
105 cm | Hvítá við Iðu | Katrín Tanja Davíðsdóttir | 24. september 24.9. |
101 cm | Víðidalsá | Jón Eðvald Halldórsson | 22. september 22.9. |
107 cm | Grímsá | Jón Jónsson | 22. september 22.9. |
101 cm | Miðfjarðará | Agnar Sigurjónsson | 22. september 22.9. |
101 cm | Hvítá við Iðu | Gunnar Pétursson | 20. september 20.9. |