Margar ár standa ekki undir væntingum

Laxveiðisumarið 2020 fer í sögubækurnar sem eitt af þeim árum þar sem margar laxveiðiár stóðu ekki undir væntingum. Landssamband veiðifélaga hefur birt veiðitölur fyrir síðustu viku og þar má glögglega sjá hversu margar ár eru hreinlega í vandræðum. Vikuveiði í Norðurá var þannig einungis 25 laxar. Ár eins og Þverá/Kjarrá og Grímsá eru alls ekki að skila þeirri veiði sem væntingar stóðu til. Borgarfjörðurinn virðist vera mikið áhyggjuefni þar sem er nú annað árið í röð sem veldur vonbrigðum.

Ár á Mýrunum eru að skila ágætri veiði og sama má segja um Vopnafjörðinn. Þá er Miðfjarðará að gera mun betur en nágrannar á Vesturlandi. Þannig skilaði hún vikuveiði upp á tvö hundruð laxa. 

Eystri-Rangá er í efsta sæti yfir laxveiðiár og byggir sú á alfarið á seiðasleppingum. Um sex hundruð laxar veiddust í Eystri í síðustu viku. Systuráin sú Ytri er mun rólegri og skilaði hún innan við tvö hundruð löxum.

Affallið í Landeyjum er á siglingu en sú á er borin uppi af seiðasleppingum.

Listinn yfir aflahæstu árnar breytist lítið milli vikna og eru efstu árnar sem fyrr stóru vatnsföllin á Suðurlandi. Miðfjarðará er í þriðja sæti á eftir Ytri-Rangá. Þá er Affallið komið í fimmta sætið á eftir Urriðafossi. 

Miðfjarðará er fyrsta náttúrulega laxveiðiáin sem fer upp fyrir þúsund laxa í sumar. 

• Blogga um frétt

Seinustu hundraðkallar sumarsins