Magnaður maríulax í Ytri Rangá

Sævar Karl Svansson fór í sinn fyrsta veiðitúr í vikunni. Fyrir valinu varð Ytri Rangá með pabba, honum Svani Karli Grjetarssyni. Sævar sem er 21 árs fór á Rangárflúðir. Hann var að kasta tvíhendu í fyrsta skipti og flugan sem varð fyrir valinu var hitch, neon græn plast túpa. Sævar sá algerlega einn um þetta allt. Kastaði sjálfur og eftir nokkur köst stökk lax á hitchið, ofarlega á Flúðunum.

Svakalegur hængur til að byrja ferilinn á. Ljósmynd/Aðsend

Svanur Karl viðurkenndi í samtali við Sporðaköst að pabba hjartað hefði slegið örar og óvíst væri hvor hefði verið spenntari. „Hann gerði þetta mjög flott. Spilaði fiskinn í einhverjar tuttugu mínútur og landaði honum einn. Fjöldi veiðimanna fylgdist með úr veiðihúsinu og setti það smá pressu á karlinn,“ brosti Svanur. 

Og þetta er flugan - hitchið sem hann tók, maríulaxinn. Ljósmynd/Aðsend

Þetta var enginn smá maríulax, mældist 91 sentímetri og vigtaði sextán pund. Þar sem þetta var maríulax gerði Jóhannes Hinriksson staðarhaldari undantekningu og fékk ungi veiðimaðurinn að bíta veiðiuggann og taka fiskinn heim með sér.

Samkvæmt því sem Svanur upplifði þá er Sævar sonur hans þegar farinn að skipuleggja næsta veiðitúr. Það er glæsilegt, því mikilvægt er að endurnýjun verði í veiðimönnum.

• Blogga um frétt

Seinustu hundraðkallar sumarsins