Tekist á við stórlaxa Noregs

Nils með þrjátíu pundara úr Lakselva. Veiðifélagi hans landaði fjörutíu …
Nils með þrjátíu pundara úr Lakselva. Veiðifélagi hans landaði fjörutíu punda fiski. Þessi sem Nils er með var grálúsugur. Ljósmynd/Aðsend

Margir íslenskir veiðimenn eiga sér þann draum að prófa veiði erlendis. Margir hafa látið þennan draum rætast, en aðrir gæla enn við hugsunina. Stórlaxahvíslarinn Nils Folmer Jörgensen er við veiðar í einni af laxveiðiperlum Noregs. Það er áin Lakselva og á svæðið er kennt við Olderö. Sporðaköst slógu á þráðinn til Noregs og forvitnuðust um hvernig veiðin gengi þar.

Lakselva er töluvert minna vatnsfall en Alta og auveldlega veidd …
Lakselva er töluvert minna vatnsfall en Alta og auveldlega veidd með 12 til 13 feta stöngum. Ljósmynd/Nils Folmer

„Ég er svo feginn að vera loksins kominn. Í tvígang hef ég lent í frestun. Bæði vegna flóða og einnig vegna Covid-19. En loksins gekk þetta upp. Þegar við hófum veiðar voru skilyrði afar góð. Nýlega hafði rignt og áin vaxið hressilega í vatni. Framundan var svo þurrkatíð,“ sagði Nils í símtali við Sporðaköst.

Svona skilyrði eru ávísun á veiði og strax fyrsta kvöldið landaði hann tveimur löxum. Annar vigtaði þrjátíu pund og var lúsugur. Fjörið hélt áfram og morguninn eftir landaði hann tveimur löxum og sá stærri var 25 pund. 

Veiðihúsið við Olderö er hið huggulegasta og veiðimenn geta slakað …
Veiðihúsið við Olderö er hið huggulegasta og veiðimenn geta slakað á að veiðidegi loknum. Ljósmynd/Nils Folmer

„Eftir þriggja daga veiði var ég búinn að landa sex löxum og það var vonum framar því Noregur er ekki þekktur fyrir magnveiði, miklu frekar eru það þeir stóru sem daga veiðimenn hingað. Og veiðifélagi minn Dan fékk svo sannarlega að handleika eitt slíkt eintak, en hann landaði fjörutíu punda laxi.“

Nils hefur verið að taka þessa fiska á Sunray afbrigði og fluguna Metallicu sem hann hannaði.

Olderö eru einkasvæði í ánni Lakselva. Hún er ekki langt frá hinni nafntoguðu Alta og einnig þekkt fyrir stóra laxa. Það sem Nils finnst sérstaklega ánægjulegt við Olderö svæðið er að fyrirkomulag veiðanna er svipað og á Íslandi. Tvær veiðivaktir á dag og fullt fæði í veiðihúsinu. Þar sem Lakselva er mun minni á en Alta segir Nils þægilegt að veiða hana með tólf til þrettán feta stöngum. Á svæðinu eru einungis sex stangir og því rúmt um veiðimenn.

mbl.is

Seinustu hundraðkallar sumarsins

Lengd á laxi Veiðisvæði Veiðimaður Dagsetning Dags.
101 cm Miðfjarðará Erik Koberling 18. september 18.9.
104 cm Víðidalsá Nils Folmer Jörgensen 18. september 18.9.
100 cm Miðfjarðará Páll Guðmundsson 15. september 15.9.
101 cm Víðidalsá Hörður Sigmarsson 15. september 15.9.
108 cm Vatnsdalsá Ingólfur Davíð Sigurðsson 10. september 10.9.
103 cm Vatnsdalsá Nils Folmer Jörgensen 9. september 9.9.
100 cm Hrútafjarðará Gísli Vilhjálmsson 9. september 9.9.

Skoða meira