Veiðimenn hafa verið duglegir að senda inn myndir frá sumrinu í veiðimyndasamkeppni Veiðihornsins, Árvakurs og Sporðakasta. Hér birtum við nokkrar skemmtilegar sem hafa borist.
Fyrsta myndin er tekin við Hagafoss í Geirlandsá. „Veðrið lék við okkur þennan daginn, 20 gráður, sól og logn. Gangan þarna uppeftir er krefjandi en þó hverrar mínútu virði,“ skrifaði myndasmiðurinn Styrmir Gauti Fjeldsted í pósti til Sporðakasta.
Veiðimaðurinn Brynjar Freyr Garðarsson rennir þarna flugu fyrir fiskinn sem vildi þó ekki taka þennan daginn.
Hér er svo mynd sem tekin var í Efri-Haukadalsá, Eysteinn Hjálmarsson tók hana. Á myndinni má sjá bjartsýnan veiðimann renna fyrir lax í giljum Efri-Hauku, veiðimaðurinn heitir Aron Brandsson. Einnig fylgir mynd sem sannar að lax sé kominn upp í Efri-Haukadal í byrjun júlí.
Í sumar veitum við verðlaun fyrir fjóra flokka mynda. Þeir eru eftirfarandi. Ungir veiðimenn, Veiðikonur, Stórir fiskar og loks Veiðimynd ársins.
Vegleg verðlaun verða veitt í hverjum flokki:
Ungir veiðimenn – Redington-krakkafluguveiðipakki.
Veiðikonur – Simms G3 Guide Gore-tex-dömuveiðijakki.
Stórir fiskar – Mclean-háfur með innbyggðri vigt.
Veiðimynd ársins – Sage Igniter-einhenda.
Allar myndir sem sendar eru til þátttöku er gjaldgengar og mun dómnefnd skipuð reynsluboltum, bæði í veiði og ljósmyndun, fara yfir og meta hvern flokk fyrir sig.
Þær myndir sem sendar eru inn er heimilt að birta í árlegu riti Veiðihornsins, Veiði 2021, og/eða öðrum auglýsingum Veiðihornsins Með því að senda mynd samþykkir ljósmyndari slíka notkun á henni.
Senda skal myndirnar í góðri upplausn á netfangið eggertskula@mbl.is. Greina skal frá hvar myndin er tekin og hvað var að gerast. Þá er nauðsynlegt að fá nöfn þeirra sem eru á myndinni og ekki síst hver tók hana, því það er sá sem hlýtur verðlaunin ef vel tekst til.
Lengd á laxi | Veiðisvæði | Veiðimaður | Dagsetning Dags. |
---|---|---|---|
101 cm | Vatnsdalsá | Erlendur veiðimaður | 29. september 29.9. |
101 cm | Eystri-Rangá | Grzegorz Loszewski | 27. september 27.9. |
105 cm | Hvítá við Iðu | Katrín Tanja Davíðsdóttir | 24. september 24.9. |
101 cm | Víðidalsá | Jón Eðvald Halldórsson | 22. september 22.9. |
107 cm | Grímsá | Jón Jónsson | 22. september 22.9. |
101 cm | Miðfjarðará | Agnar Sigurjónsson | 22. september 22.9. |
101 cm | Hvítá við Iðu | Gunnar Pétursson | 20. september 20.9. |