SVFR tekur Flekkudalsá á leigu

Frá Flekkudalsá í Dalasýslu. Hún verður nú hluti af vöruframboði …
Frá Flekkudalsá í Dalasýslu. Hún verður nú hluti af vöruframboði Stangaveiðifélags Reykjavíkur. mbl.is/Einar Falur

Stangaveiðifélag Reykjavíkur er að bæta við sig enn einu vatnasvæði. Ekki er langt síðan greint var frá því að SVFR hefði tekið Sandá í Þistilfirði á leigu frá og með næsta sumri. Nú bætist Flekkudalsá við í úrval fyrir félagsmenn og aðra. Fréttatilkynning frá SVFR um málið hljómar svona.

„Samstarfssamningur um vatnasvæði Flekkudalsár milli Veiðifélags Fellsstrandar og Stangaveiðifélags Reykjavíkur var undirritaður í gær. Með samningnum hefur SVFR tryggt sér eina eftirsóknarverðustu sjálfsmennskuá á Vesturlandi.  

„Flekkan er frábær laxveiðiá og fellur mjög vel að þörfum félagsmanna SVFR. Hún er allt í senn; frábær laxveiðiá, sérlega falleg og tilkomumikil og fjölskylduvæn. Samstarfssamningurinn tekur ennfremur mið af þeim aðstæðum sem nú eru uppi og er hagfelldur fyrir báða aðila eins og allir samningar eiga að vera,“ segir Jón Þór Ólason, formaður SVFR. „Við leggjum áherslu á gott samstarf við landeigendur, enda teljum við ótvírætt að hagsmunir leigusala og leigutaka fari saman.“ 

Jón Þór Ólason formaður stjórnar SVFR.
Jón Þór Ólason formaður stjórnar SVFR. Ljósmynd/Aðsend

Flekkudalsá er þriggja stanga 20 km löng dragá sem á efstu upptök sín á hálendinu í Klofningsfjallgarði, og fellur til sjávar í Hvammsfjörð vestan við bæinn Ytra-Fell á Fellsströnd eftir að hafa runnið frá upptökum sínum í gegnum stórbrotið umhverfi í skógi vöxnum Flekkudal. Er það mat margra að Flekkan sé ein fallegasta laxveiðiá á Íslandi. Nær vatnasvæðið yfir Flekkudalsá, Kjarlaksstaðaá og Tunguá.

„Flekkan á sér marga aðdáendur og við hlökkum til að gefa félagsmönnum SVFR kost á að veiða í henni. Fastagesti árinnar bjóðum við að sjálfsögðu velkomna í félagið,“ segir Jón Þór.

mbl.is

Seinustu hundraðkallar sumarsins

Lengd á laxi Veiðisvæði Veiðimaður Dagsetning Dags.
103 cm Mýrarkvísl Matthías Þór Hákonarson 30. september 30.9.
103 cm Stóra Laxá Ársæll Þór Bjarnason 29. september 29.9.
101 cm Stóra Laxá Friðjón Mar Sveinbjörnsson 28. september 28.9.
100 cm Víðidalsá Nils Folmer Jörgensen 26. september 26.9.
104 cm Víðidalsá Þorsteinn Sverrisson 25. september 25.9.
101 cm Snæfoksstaðir Sigurður Þór Sigurðsson 23. september 23.9.
107 cm Víðidalsá Kristján Jónsson 23. september 23.9.

Skoða meira