Sá stærsti úr Víðidal í sumar

Stærsti lax sumarsins til þessa veiddist í gær í Víðidalsá. Það var danski stórlaxasegullinn Nils Folmer Jörgensen sem setti í og landaði þessum 104 sentímetra fiski í Bakkafljóti.

Forsaga málsins er sú að Jón Heimir Sigurbjörnsson, sem var í hollinu með Nils, varð var við fisk í Bakkafljóti fyrsta kvöldið og taldi Jón engan vafa leika á því að fiskurinn væri hundrað sentímetrar plús. „Ég mætti þarna uppveðraður og spenntur morguninn eftir. Sama hvað ég reyndi þá leit hann ekki við smáflugunum mínum. Ég skipti því yfir í aðferð sem oft er notuð í Víðidal og víðar. Setti undir smáa Frances-túpu, þó ekki þyngda. Þegar ég var hálfnaður niður hylinn stökk skyndilega út á hlið risastór hængur. Ég var mjög hissa þegar ég fattaði að hann hafði tekið fluguna. Hann tók svaka roku niður allan hylinn og nánast strandaði sér þar. Þegar ég nálgaðist hann og náði línunni inn á hjólið trylltist hann aftur og rauk upp úr, eins og tundurskeyti.“ Svona lýsti Nils Folmer viðureigninni í samtali við Sporðaköst. 

Skömmu síðar var laxinn háfaður og mældist hann 104 sentímetrar en það er stærsti laxinn til þessa úr Víðidalsá.

Nils segir að þetta sé aðeins lax númer tvö sem hann veiðir á rauða Frances á sínum ferli sem laxveiðimaður.

„Við vorum báðir búnir á því eftir þessi hlaup og spennu. Þetta var sjötti laxinn minn í túrnum og líkast til sá síðasti í sumar,“ sagði kátur Nils að lokum.

• Blogga um frétt

Seinustu hundraðkallar sumarsins