Lokatölur - aðeins örfáar ár eru opnar

Stærsti lax sumarsins. 108 sentímetrar í Vatnsdalsá. Ingólfur Davíð sleppir …
Stærsti lax sumarsins. 108 sentímetrar í Vatnsdalsá. Ingólfur Davíð sleppir laxinum. Sumarið var afar köflótt en í heild frekar slakt. Ljósmynd/Aðsend

Laxveiðitímabilinu er lokið í náttúrulegu laxveiðiánum. Þó er enn töluvert sem vantar upp á að lokatölur séu komnar í hús fyrir þær ár sem Landssamband veiðifélaga heldur tölur um. Skýringar hafa verið gefnar á því. Vefur Landssambandsins birti þessa frétt í dag.

"Samantektin er seinna á ferðinni en ekki hafa borist veiðitölur úr öllum ám og í sumum tilvikum skýrist það af því að veiðihús hafa lokað og fyrir vikið er minni viðvera og tækifæri að sækja upplýsingar úr veiðibók/veiðibókum. En tölur skila sér að lokum og verða þær settar inn þegar þær berast. Alls hafa borist lokstölur úr 30 vatnakerfum og von er á fleirum fljótlega.

Eystri-Rangá er efst á listanum og komin í alls 8325 laxa, skilaði vikuveiðin samtals 198 löxum sem er aukning um 84 laxa miðað við vikuna á undan. Veiðin er sú mesta frá upphafi og 852 löxum betur en mesta veiði var árið 2007 þegar alls veiddust 7473 laxar. 

Ytri-Rangá er í öðru sæti og komin í alls 2519 laxa og skilaði vikuveiðin 88 löxum.

 Í þriðja sæti er Miðfjarðará sem er efst á lista þeirra vatnakerfa sem byggja veiði ekki alfarið á seiðasleppingum. Lokatalan er 1725 laxar.

Í fjórða sæti er Affall í Landeyjum en samtals hefur veiðst 1617 og skilaði veiðivikan 20 löxum.

Í fimmta sæti er Selá í Vopnafirði en þar lauk veiði í samtals 1258 löxum."

Selá var nokkuð undir veiðinni í fyrra en þá skilaði hún tæplega 1500 löxum.

Næstu ár er fróðlegt að skoða. Haffjarðará átti mjög sumar, sérstaklega þegar horft er til Vesturlands í heild sinni. Lokatalan þar var 1126 laxar á sex stangir. Í fyrra var heildarveiðin 651 lax. Það er nánast tvöföldun.

Langá er á svipuðu reki, en með tvöfalt fleiri stangir en Haffjarðará. Langá endaði í 1086 löxum á móti 759 í fyrra.

Þverá/Kjarrá veldur vonbrigðum og er undir heildarveiði þurrka og fiskleysis sumrinu 2019. Lokatölur eru 1060 en voru í fyrra 1133. Það þarf að fara aftur til ársins 2012 til að finna lægri tölu fyrir þetta stolt Borgarfjarðar. En árinu 2020, 2019 og 2012 er verstu ár í sögu Þverá/Kjarrár, eins langt aftur og gögn sýna.

Í níunda sæti er Hofsá í Vopnafirði. Hún átti frábært sumar og í raun það besta frá 2013. Loksins brýtur hún aftur þúsund laxa múrinn.

Í tíunda sæti er svo Laxá í Kjós með 1015 laxa og er það mögnuð endurkoma frá hörmungasumrinu 2019. Þetta er nánast þreföldun í veiði en áin endaði í 372 löxum í fyrra. Lokatölur hafa ekki verið staðfestar í Kjósinni.

Lokatölur verða gerðar betur upp síðar.

mbl.is

Seinustu hundraðkallar sumarsins

Lengd á laxi Veiðisvæði Veiðimaður Dagsetning Dags.
103 cm Mýrarkvísl Matthías Þór Hákonarson 30. september 30.9.
103 cm Stóra Laxá Ársæll Þór Bjarnason 29. september 29.9.
101 cm Stóra Laxá Friðjón Mar Sveinbjörnsson 28. september 28.9.
100 cm Víðidalsá Nils Folmer Jörgensen 26. september 26.9.
104 cm Víðidalsá Þorsteinn Sverrisson 25. september 25.9.
101 cm Snæfoksstaðir Sigurður Þór Sigurðsson 23. september 23.9.
107 cm Víðidalsá Kristján Jónsson 23. september 23.9.

Skoða meira