IO að taka Ytri-Rangá í umboðssölu

Stjórn Veiðifélags Ytri-Rangár hefur tekið ákvörðun um að ganga til samninga við Iceland Outfitters, sem hjónin Stefán Sigurðsson og Harpa Hlín Þórðardóttir eiga og reka. Samningurinn mun hljóða upp á umboðssölu á ánni, frá og með sumrinu 2022.

Ari Árnason framkvæmdastjóri veiðifélagsins staðfesti þetta í samtali við Sporðaköst fyrr í dag. Hann sagði það trú stjórnar félagsins að áin gæti staðið undir hærra verði en tilboðin sem bárust hljóðuðu upp á. Hann benti líka á að með þessum hætti væri félagið nær markaðnum og fengi sveiflurnar beint í fangið og ætti auðveldara með að skilja þær og bregðast við þeim.

Stefán Sigurðsson hjá IO sagði þau hjónin mjög ánægð með þessa stöðu. „Við þekkjum þetta svæði vel og höfum áður unnið við að selja það. Ég var sjálfur staðarhaldari þarna um tíma og við vitum vel út í hvað við erum að fara,“ sagði Stefán í samtali við Sporðaköst.

Auðheyrt var að margir af þeim sem buðu í Ytri-Rangá voru mjög hissa á niðurstöðunni, að Veiðifélagið ætlaði að ganga framhjá föstu tilboði Hreggnasa ehf., sem var með hæsta tilboðið, upp á um 170 milljónir króna fyrir allt vatnasvæðið.

Stefnt er að því að halda félagsfund í Veiðifélagi Ytri-Rangár undir loks mánaðarins og verður tillaga stjórnar þá borin upp til atkvæða.

• Blogga um frétt

Seinustu hundraðkallar sumarsins