Sex tilboðsgjafar sem buðu í veiðiréttinn í Ytri-Rangá og vesturbakka Hólsár hafa sent frá sér harðorða yfirlýsingu þar sem þeir fordæma vinnubrögð stjórnar Veiðifélagsins í tengslum við útboð sem fram fór í síðasta mánuði.
Eins og greint hefur verið frá á Sporðaköstum hér á mbl.is bárust tólf tilboð frá níu aðilum í veiðiréttinn. Hæsta tilboð var frá Veiðifélaginu Hreggnasa, og hefur verið metið á rúmar 160 milljónir króna á ári. Stjórn Veiðifélags Ytri-Rangár og vesturbakka Hólsár, ákvað hins vegar að leggja til við félagsfund að samið verði við Iceland Outfitters, um umboðssölu á veiðileyfum á vatnasvæðinu. Stefnt er að því að félagsfundur fari fram í lok mánaðar og þar verður tillaga stjórnar kynnt.
Nú hafa sex af níu tilboðsgjöfum tilkynnt Veiðifélaginu að bjóðendur áskilji sér allan rétt að lögum og þar með talið að krefjast bóta í kjölfar ákvörðunar stjórnar Veiðifélagsins.
„Bjóðendur furða sig á þeirri niðurstöðu sem nú virðist liggja fyrir í kjölfar útboðsins, skv. fréttum, enda er hún í algjörri þversögn við útboðsgögn og tilboð sem bárust í útboðinu. Bjóðendur telja að ekki hafi verið farið að lögum og reglum um útboð. Bjóðendur hafi allir lagt á sig mikla vinnu við tilboðsgerð í því skyni að skila Veiðifélaginu og landeigendum sem bestri niðurstöðu og ber framkoma stjórnar vott um algert skeytingarleysi gagnvart bjóðendum. Slík vinnubrögð eru forkastanleg og á engan hátt til þess fallin að auka trúverðugleika á niðurstöður útboða veiðifélaga á Íslandi til framtíðar,“ segir orðrétt í yfirlýsingunni.
Undir yfirlýsinguna rita sex aðilar sem allir skiluðu inn tilboði í veiðiréttinn. Fish Partner, óstofnað félag á vegum Gunnars Norðdahl, félagið I am Iceland, Kristinn Ingólfsson og Guðmundur Atli, sem buðu í vesturbakka Hólsár, Veiðifélagið Hreggnasi og West Ranga Property Group Ltd.
Yfirlýsingin var send á stjórn Veiðifélags Ytri-Rangár og einnig til Landssambands veiðifélaga. Sporðaköst náðu tali af Ara Árnasyni, framkvæmdastjóra Veiðifélagsins, og vildi hann ekki tjá sig um málið að svo stöddu.
Lengd á laxi | Veiðisvæði | Veiðimaður | Dagsetning Dags. |
---|---|---|---|
101 cm | Vatnsdalsá | Erlendur veiðimaður | 29. september 29.9. |
101 cm | Eystri-Rangá | Grzegorz Loszewski | 27. september 27.9. |
105 cm | Hvítá við Iðu | Katrín Tanja Davíðsdóttir | 24. september 24.9. |
101 cm | Víðidalsá | Jón Eðvald Halldórsson | 22. september 22.9. |
107 cm | Grímsá | Jón Jónsson | 22. september 22.9. |
101 cm | Miðfjarðará | Agnar Sigurjónsson | 22. september 22.9. |
101 cm | Hvítá við Iðu | Gunnar Pétursson | 20. september 20.9. |