Veiði í Vatnamótunum hefur verið virkilega góð í apríl, þegar aðstæður hafa verið í lagi. Sporðaköst hafa heyrt frá nokkrum veiðimönnum sem hafa lent í moki. Þeir félagar og laxveiðileiðsögumenn Jóhann Birgisson og Helgi Guðbrandsson voru við veiðar um páskana og eins og flestir veiðimenn muna var ríkjandi kuldakast þá daga.
„Þann tíma sem við náðum að veiða var bara fín veiði, bæði uppi við efra bílastæði og niðri við bakkann,“ sagði Helgi Guðbrandsson í samtali við Sporðaköst. Hann upplýsti að Blue Ghost, Black Ghost og Rektor hefðu gefið best. Hann þurfti að hugsa sig um þegar hann var spurður um fjölda fiska sem hann hefði fengið. „Sennilega voru þeir 23.“
Jóhann Birgisson landaði 22 sjóbirtingum. „Þetta voru ýmist geldfiskur og stærri birtingar í bland. Veðrið var samt þannig að á endanum gáfumst við upp. Ég var mest hræddur um að brjóta veiðijakkann þegar ég var að fara úr honum. Hann var beinfrosinn.“ Jóhann sagði svipaða sögu um flugur sem virkuðu. Black Ghost og Rektor gáfu honum flesta fiska.
Eftir kuldakaflann tóku við leysingar og Vatnamótin urðu kakólituð. Veiðimenn sem mættu til leiks þegar vatn var sjatnandi gerðu mikla veiði og hafa Sporðaköst staðfest dæmi um 26 á eina stöng á tveimur dögum.
Lengd á laxi | Veiðisvæði | Veiðimaður | Dagsetning Dags. |
---|---|---|---|
101 cm | Vatnsdalsá | Erlendur veiðimaður | 29. september 29.9. |
101 cm | Eystri-Rangá | Grzegorz Loszewski | 27. september 27.9. |
105 cm | Hvítá við Iðu | Katrín Tanja Davíðsdóttir | 24. september 24.9. |
101 cm | Víðidalsá | Jón Eðvald Halldórsson | 22. september 22.9. |
107 cm | Grímsá | Jón Jónsson | 22. september 22.9. |
101 cm | Miðfjarðará | Agnar Sigurjónsson | 22. september 22.9. |
101 cm | Hvítá við Iðu | Gunnar Pétursson | 20. september 20.9. |