Þó svo að Laxá í Aðaldal sé þekktust fyrir laxinn, þá er víða að finna góð urriðamið í ánni og sérstaklega fyrri hluta sumars. Eitt þessara svæða er Árbótarsvæðið. Það er ekki inni í Laxárskiptingunni.
Um er að ræða tveggja stanga svæði og er þar oft mikil urriðaveiði, en yfir sumartímann er svæðið selt sem laxasvæði. Örn Logi Hákonarson landeigandi fór með börnum sínum til veiða í gær. Urriðinn hefur verið mjög tregur í kuldatíðinni fyrir norðan. Þó bar svo við í gær að veiðimenn náðu þremur góðum urriðum og misstu nokkra, því eins og Logi orðaði það í samtali við Sporðaköst þá var kalt í gær og tökur nettar.
Urriðarnir tóku allir hina klassísku straumflugu Rektor, bæði þeir sem náðust og einnig þeir sem misstust. „Áin er enn mjög köld og frekar vatnslítil vegna tíðafarsins, en við urðum vör við meira af fiski en í fyrri ferðum. Nú bíðum við bara að hlýni og þá á hann að gefa sig,“ sagði Logi í samtali við Sporðaköst.
Mest var lífið á veiðistaðnum Syðri Seltanga og þar var þessum þremur urriðum landað. Spáð er hlýnandi veðri næstu daga og verður spennandi að sjá hvort lifnar þá ekki enn frekar yfir hinum rómaða Laxárurriða.
Lengd á laxi | Veiðisvæði | Veiðimaður | Dagsetning Dags. |
---|---|---|---|
101 cm | Vatnsdalsá | Erlendur veiðimaður | 29. september 29.9. |
101 cm | Eystri-Rangá | Grzegorz Loszewski | 27. september 27.9. |
105 cm | Hvítá við Iðu | Katrín Tanja Davíðsdóttir | 24. september 24.9. |
101 cm | Víðidalsá | Jón Eðvald Halldórsson | 22. september 22.9. |
107 cm | Grímsá | Jón Jónsson | 22. september 22.9. |
101 cm | Miðfjarðará | Agnar Sigurjónsson | 22. september 22.9. |
101 cm | Hvítá við Iðu | Gunnar Pétursson | 20. september 20.9. |