Rólegt í Blöndu og Þverá á fyrstu vakt

Bæði Blanda og Þverá voru opnaðar í morgun. Veiðin fór rólega af stað í báðum ánum. Snemma í morgun var fyrsta laxinum í Þverá landað í Kaðalstaðastreng, sem oft er mjög sterkur í opnun. Þetta var fallegur tveggja ára lax sem gaf góð fyrirheit. Veiðin var hins vegar róleg það sem eftir lifði vaktarinnar. Góðu fréttirnar sem veiðimenn eru alltaf duglegir að þefa uppi er að líflegt var í Brennunni, sem er ósasvæði Þverár. Þar sáu veiðimenn laxa og það er fiskur sem er á leið upp í Þverá.

Það voru spenntir veiðimenn sem hófu veiðar í Blöndu eldsnemma í morgun. Meðal þeirra voru frændurnir Reynir Sigmundsson og Ársæll Þór Bjarnason sem hófu veiðar á Breiðunni að sunnanverðu. Fyrst setti Ársæll í lax og missti hann. Þá var komið að Reyni. Hann setti fljótlega í fisk sem tók kröftuglega á harðastrippi. Hann lak af eftir dágóðan tíma. Reynir setti í annan lax og það var sama sagan. Hann slapp líka. Þrír misstir á fyrstu klukkustundunum.

Engum laxi var landað í Blöndu á fyrstu vaktinni, en vissulega voru þeir mættir. Erik Koberling staðarhaldari vonast eftir að hann mæti í meira magni á allra næstu dögum. „Þetta er fljótt að gerast þegar hann mætir,“ sagði Koberling í samtali við Sporðaköst.

Blanda og Þverá eru þriðja og fjórða af stóru laxveiðiánum sem opnaðar eru. Fyrsta áin var Þjórsá og þar hefur gengið vel frá opnun. Norðurá var opnuð í gær og skilaði opnunardagurinn fjórum löxum og við vitum um tvo í morgun. Áin tók nokkurn lit í gærdag, sem torveldaði veiðiskapinn. Fram undan eru opnanir í nýrri viku. Meðal annars Kjarrá og svo fara þær að opnast ein af annarri.

• Blogga um frétt

Seinustu hundraðkallar sumarsins