Fjórum löxum var landað á fyrstu vakt í Víðidalsá. Veiði hófst þar í morgun og voru veiðimenn hóflega bjartsýnir sérstaklega í ljósi þess hvernig veiði hefur byrjað um vestanvert landið. Fyrsti laxinn kom á land rúmlega átta í morgun. Hann veiddist í þeim rómaða veiðistað, Dalsárósi. 82 sentimetra hrygna, vel haldin og nýgengin þó að ekki væri lús á henni.
Fannar Jónsson landaði fyrsta laxinum og bætti um betur nokkru síðar og fékk lax á Speglinum sem er veiðistaður ofan við Dalsárós.
Líflegt var áfram í Dalsárósi og þar misstust tveir laxar.
Í Fitjá, sem er hliðará Víðidalsár, var búið að sjá nokkuð af laxi, neðarlega og settu veiðimenn þar í sex laxa í morgun en lönduðu aðeins einum. Það var Guðmundur Hannesson sem veiddi fyrsta laxinn í Fitjá á þessu veiðitímabili.
Fjórði laxinn fékkst svo í Símastreng og gáfu því þrjú af fjórum svæðum lax. Veiðimenn sem eru að opna Víðidalsá voru sammála um að ekki sé mikið af fiski gengið en veiðin fór fram úr hófstilltum væntingum sem lagt var upp með í morgun.
Fyrsta vakt í Elliðaánum gaf ekki lax. Þó er vitað að nokkuð langt er síðan fyrstu laxarnir sáust þar og væntanlega gefur hann sig síðdegis í dag.
Laxá í Aðaldal og Vatnsdalur opna síðdegis og munum við flytja fréttir af gangi þar.
Lengd á laxi | Veiðisvæði | Veiðimaður | Dagsetning Dags. |
---|---|---|---|
101 cm | Vatnsdalsá | Erlendur veiðimaður | 29. september 29.9. |
101 cm | Eystri-Rangá | Grzegorz Loszewski | 27. september 27.9. |
105 cm | Hvítá við Iðu | Katrín Tanja Davíðsdóttir | 24. september 24.9. |
101 cm | Víðidalsá | Jón Eðvald Halldórsson | 22. september 22.9. |
107 cm | Grímsá | Jón Jónsson | 22. september 22.9. |
101 cm | Miðfjarðará | Agnar Sigurjónsson | 22. september 22.9. |
101 cm | Hvítá við Iðu | Gunnar Pétursson | 20. september 20.9. |