Hafró vill heilfrysta hnúðlaxa

Síðustu daga hafa veiðimenn verið iðnir við að senda Sporðaköstum upplýsingar yfir veidda hnúðlaxa víða um land. Þetta eru mikilvægar upplýsingar um þennan nýbúa í íslenskum ám. Hafró óskar eftir sýnum frá veiðimönnum og best er að fá fiskinn heilfrystan.

Guðni Guðbergsson fiskifræðingur lýsti ánægju sinni með að veiðimenn væru að upplýsa um þessa veiði. En það var einmitt Guðni sem lýsti því yfir í vor að ekki væri ólíklegt að veruleg aukning yrði á göngu hnúðlaxa í íslenskar ár. Þá liggur fyrir að innrás hnúðlaxa í ár í Norður-Noregi er mun meiri en nokkur gat ímyndað sér.

„Við myndum gjarnan vilja fá sýni af hnúðlöxum, helst heila fiska. Við erum þátttakendur í rannsóknaverkefni þar sem til stendur að rannsaka bæði erfðaefni með tilliti til uppruna fiska og ísótópa til að rannsaka fæðu og mögulega uppeldisstöðvar í sjó. Lengd, þyngd, kyn, hreistur og kvarnir ásamt nokkrum grömmum af holdi er það sem þarf og ef menn geta séð af heilum fiskum frosnum væri það best,“ sagði Guðni Guðbergsson, sviðsstjóri hjá Hafrannsóknastofnun, í samtali við Sporðaköst.

Við hvetjum veiðimenn sem veiða hnúðlax til að drepa hann og frysta og koma til Hafrannsóknastofnunar. Vitneskja er mikilvæg í þessu samhengi.

• Blogga um frétt

Seinustu hundraðkallar sumarsins