Hnúðlax staðfestur í flestum ám landsins
Hnúðlax hefur verið að veiðast í sífellt fleiri ám og vatnasvæðum síðustu vikurnar. Nú er svo komið að til undatekninga heyrir ef ekki hefur veiðst hnúðlax á vatnasvæðinu. Lesendur mbl.is brugðust vel við beiðni um að senda upplýsingar um veiði á þessum framandi gesti í íslenskum ám.
Þann 6. ágúst veiddist hnúðlaxahrygna í Bárðarfossi í Brynjudalsá. Laxinn var frystur og verður sendur Hafrannsóknastofnun til skoðunar. Þetta staðfesti Þorsteinn Guðbrandsson í samtali við Sporðaköst, en það var einmitt sonur hans sem veiddi fiskinn.
Gunnar Reimarsson lét okkur vita af hnúðlaxi sem veiddist á silungasvæði Miðfjarðarár í Saurahyl, rétt neðan Laugarbakka. Gunnar sagðist hafa séð sex aðra slíka laxa í hylnum.
Tilkynningar hafa borist úr mörgum minni ám. Þannig veiddist hnúðlax í Stöðvará í Stöðvarfirði 11. ágúst. Tveir hnúðlaxar hafa verið skráðir í veiðibók í Norðfjarðará. Einn slíkur veiddist í Fjarðará í Loðmundarfirði og hafa borist fréttir úr fleiri ám.
Nú er svo komið að það heyrir til undatekninga ef hnúðlax hefur ekki veiðst á veiðisvæði í sumar. Ljóst er að hnúðlaxabylgjan mun rísa enn hærra sumarið 2023 þar sem að lífsferill þessa stofns er tvö ár. Miðað við magn af fiski og útbreiðslu er afar líklegt að hann nái að hrygna í sífellt fleiri ám hér á landi.