Hnúðlaxaævintýri í Selá

Dregið á í Selá í gærkvöldi. Þrír hnúðlaxar komu í …
Dregið á í Selá í gærkvöldi. Þrír hnúðlaxar komu í netið, en töluvert magn slapp undir netið. Frekari aðgerðir eru fyrirhugaðar. Ljósmynd/Aðsend

Hnúðlax hefur víða sett svip sinn á veiðisumarið. Í Vopnafirði hefur töluvert magn gengið í Hofsá og Selá. Sá fáheyrði atburður gerðist nýverið í Selá að veiðimaður sem þar var landaði tveimur fiskum í einu.

Vífill Gústafsson var að veiða Fossbreiðuna og setti fljótlega í lax á Sunray shadow. Ekki bjuggust menn við langri viðureign þar sem þetta var smálax. Eftir nokkra stund gerði Helgi leiðsögumaður sig kláran að háfa laxinn. Skyndilega var eins og smálaxinn gengi í endurnýjun lífdaga og aukinn kraftur hljóp í baráttuna. Það var svo eftir dágóðan tíma sem leikurinn barst á nýjan leik að háfnum.

Sér til mikillar undrunar sá Helgi leiðsögumaður að hnúðlax var nánast límdur upp við laxinn. Hann brá háfnum undir þá báða. Kom í ljós að hnúðlaxinn hafði líka tekið Sunrayinn. Tennurnar á hnúðlaxinum höfðu fests í hárunum á flottúbunni og höfðu því báðir tekið fluguna. 

Í gærkvöldi var gripið til þess ráðs að fara með net í Stekkjarhyl í Selá eftir að veiðitíma lauk. Þar hefur veiðst töluvert af hnúðlaxi í sumar. Þrír slíkir komu í netið, en nokkurt magn af hnúðlaxi slapp undir netið.

Upphaflega stóð til að draga á valda veiðistaði í Vopnafjarðaránum, eftir veiðitímabilið en þeim áformum  var breytt í ljósi þess að hnúðlaxinn hrygnir fyrr en Atlantshafslaxinn.  Hnúðlaxinn heldur sig fyrst og fremst á hægum stöðum þar sem lítill straumur er og gjarnan á grunnu vatni.

mbl.is

Seinustu hundraðkallar sumarsins

Lengd á laxi Veiðisvæði Veiðimaður Dagsetning Dags.
102 cm Víðidalsá/Fitjá Nils Folmer Jörgensen 19. september 19.9.
100 cm Eystri-Rangá Hannes Gústafsson 14. september 14.9.
102 cm Vatnsdalsá Sigurður Héðinn 11. september 11.9.
100 cm Eystri-Rangá Hilmar Ingimundarson 10. september 10.9.
102 cm Víðidalsá/Fitjá Rögnvaldur Örn Jónsson 8. september 8.9.
101 cm Laxá í Aðaldal Nils Folmer Jörgensen 30. ágúst 30.8.
102 cm Kjarrá Jake Elliot 30. ágúst 30.8.

Skoða meira