Róbert Grímur Grímsson kom í fyrsta skipti í Miðfjarðará í því holli sem nú er við veiðar. Hann átti Austurá efri og hafði frétt af stórlaxi sem var að velta sér neðan við Skárastaðabrú. Hann lagði áherslu á veiðistaðinn og fljótlega velti fiskur sér á fluguna en það var ekki alvörusamband og sá fór af.
„Bara rétt á eftir fékk ég neglu á Polar Monkey fly. Ég hafði heyrt Spánverja sem voru í hollinu á undan tala um þessa flugu. Ég keypti nokkur eintök á flugubarnum í veiðihúsinu og ákvað að láta hana svífa. Það var negla í þriðja kasti. Ég sá strax að þetta var eitthvert monster. Samt var ég ekki nema svona tuttugu mínútur með hann. En ég var einn og þurfti að sporðtaka hann úti í á. Rétt áður en ég sleppti honum komu félagar mínir og gátu staðfest mælingu. Sléttir hundrað sentímetrar,“ sagði afar glaður Róbert í samtali við Sporðaköst í morgunsárið.
Krókódílatíminn er runninn upp og við greindum í gær frá 104 sentímetra laxi í Stóru-Laxá og það var svo sannarlega kominn tími á einn í þessum stærðarflokki í Miðfirði.
„Rabbi leigutaki er búinn að lofa mér stöng í þessu holli á næsta ári og ég hlakka strax til að koma aftur í Miðfjörðinn,“ sagði Róbert í samtali við Sporðaköst.
Lengd á laxi | Veiðisvæði | Veiðimaður | Dagsetning Dags. |
---|---|---|---|
101 cm | Vatnsdalsá | Erlendur veiðimaður | 29. september 29.9. |
101 cm | Eystri-Rangá | Grzegorz Loszewski | 27. september 27.9. |
105 cm | Hvítá við Iðu | Katrín Tanja Davíðsdóttir | 24. september 24.9. |
101 cm | Víðidalsá | Jón Eðvald Halldórsson | 22. september 22.9. |
107 cm | Grímsá | Jón Jónsson | 22. september 22.9. |
101 cm | Miðfjarðará | Agnar Sigurjónsson | 22. september 22.9. |
101 cm | Hvítá við Iðu | Gunnar Pétursson | 20. september 20.9. |