Samið um Norðurá til fimm ára

Guðrún og Rafn undirrita samninginn í gær. Samið er til …
Guðrún og Rafn undirrita samninginn í gær. Samið er til fimm ára og mun félag Rafns annast sölu veiðileyfa og rekstur árinnar. Ljósmynd/Norðurá

Nýr rekstraraðili hefur tekið við Norðurá. Samningur þess efnis var undirritaður í gær í veiðihúsinu við Norðurá. Einar Sigfússon hefur verið sölustjóri þar frá árinu 2013. Hann ákvað að segja þetta gott og leitaði stjórn veiðifélags Norðurár samninga við nýja umsjónaraðila. 

Í fréttatilkynningu sem veiðifélag Norðurár sendi frá sér í tilefni þessa segir:

„Í gær undirrituðu Guðrún Sigurjónsdóttir fyrir hönd Veiðifélags Norðurár og Rafn Valur Alfreðsson f.h. FHD ehf. samning um sölu og umsjón Norðurár til næstu fimm ára. Samningurinn var samþykktur samhljóða á félagsfundi í Munaðarnesi í gærkvöldi.

Rafn Valur, eða FHD ehf., hefur rekið Miðfjarðará í rúman áratug við góðan orðstír. Formaður veiðifélags Norðurár, Guðrún Sigurjónsdóttir sagði af þessu tilefni: 

„Það var samþykkt á aðalfundi félagsins í vor að leita að söluaðila til að selja ána með líku fyrirkomulagi og gert hefur verið síðan 2013. Margir sýndu því áhuga að koma að rekstri árinnar og ræddi stjórnin við marga aðila. Niðurstaðan var að semja við Rafn í Miðfjarðará um að taka að sér sölumálin. Við gerum ráð fyrir lítillega breyttu fyrirkomulagi og fækkum stöngum aðeins og stækkum veiðisvæði,“ upplýsti Guðrún í samtali við Sporðaköst.

Þetta er eitt verst varðveitta leyndarmál í veiðiheiminum í dag, en hefur loks fengið fullnustu.

Í fréttatilkynningu um málið er eftirfarandi haft eftir Rafni í Miðfirði: „Ég er gríðarlega spenntur fyrir þessu verkefni á sama tíma og ég er afar stoltur yfir því trausti sem landeigendur í Norðurá sýna mér. Ég hef alla tíð lagt mikinn metnað í minn rekstur og það að Norðurá sé nú innan minna vébanda mun efla mig og félag mitt til að gera enn betur.  Hér er mikil saga og Norðurá á sér mjög stóran hóp aðdáenda þannig að ég er að taka við góðu búi. Við höfum fengið til liðs við okkur Brynjar Hreggviðsson sem er reyndur sölumaður og mun aðkoma hans styrkja okkur enn frekar.“

Norðurá gaf mun betri veiði í sumar en síðustu tvö ár. Fyrirhugaðar eru miklar seiðasleppingar og hrognagröftur þannig að ljóst má vera að stórhuga markmið hafa verið sett í Norðurárdal.

mbl.is

Seinustu hundraðkallar sumarsins

Lengd á laxi Veiðisvæði Veiðimaður Dagsetning Dags.
101 cm Vatnsdalsá Erlendur veiðimaður 29. september 29.9.
101 cm Eystri-Rangá Grzegorz Loszewski 27. september 27.9.
105 cm Hvítá við Iðu Katrín Tanja Davíðsdóttir 24. september 24.9.
101 cm Víðidalsá Jón Eðvald Halldórsson 22. september 22.9.
107 cm Grímsá Jón Jónsson 22. september 22.9.
101 cm Miðfjarðará Agnar Sigurjónsson 22. september 22.9.
101 cm Hvítá við Iðu Gunnar Pétursson 20. september 20.9.

Skoða meira

Fleira áhugavert
Fleira áhugavert