Fish Partner taka Vatnamótin á leigu

Félagið Fish Partner hefur tekið Vatnamótin í Skaftafellssýslu á leigu. Svæðið er víðfeðmt en þekkt sem eitt öflugasta sjóbirtingssvæði landsins. Í Vatnamótunum koma saman Skaftá, Breiðbalakvísl, Hörgsá og Fossálar.

Kristján Páll Rafnsson einn af eigendum Fish Partner segir að um langtímasamning sé að ræða og verði seldar fimm stangir á svæðið. Veruleg breyting verður gerð með aðkomu Fish Partner. Eingöngu verður veitt á flugu og skal öllum fiski sleppt. Að sögn Kristjáns er þetta gert til að stuðla enn frekar að dafnandi sjóbirtingsveiði.

Þekkt er í fjölmörgum sjóbirtingsám hin síðari ár að með veiða og sleppa fyrirkomulagi hefur fiskum fjölgað og sífellt fleiri stórfiskar eru að veiðast á þessum svæðum.

Vatnamótin eru magnaður veiðistaður en þar þarf víða að vaða mikið og leita að fiskinum. Þegar menn finna hann er oft bingó. Ljósmynd/HG

„Við erum gríðarlega spennt að sjá árangurinn af þessu breytta fyrirkomulagi og höfum mikla trú á að það muni efla þetta frábæra svæði til mikilla muna,“ segir Kristján Páll í tilefni af samningnum um Vatnamótin.

Hann segir að veiðivarsla á svæðinu verði aukin til að framfylgja breyttu fyrirkomulagi.

Samkvæmt upplýsingum frá Fish Partner hefur árleg veiði í Vatnanótunum verið um 1.500 sjóbirtingar. Fish Partner er fyrir með annað sjóbirtingssvæði í grenndinni en það er Tungufljót eins og flestir veiðimenn vita.

Þeir veiðimenn sem hafa átt föst holl á svæðinu ganga fyrir vilji þeir halda þeim hollum, kemur fram í tilkynningu frá Fish Partner. Veiðitímabilið í Vatnamótunum er frá 1. apríl til 20. október.

• Blogga um frétt

Seinustu hundraðkallar sumarsins