Benderinn orðinn „síðasti Móhíkaninn“

Gunnar Bender, ritstjóri Sportveiðiblaðsins, er að vinna að nýrri veiðiþáttaseríu fyrir sjónvarpsstöðina Hringbraut. Stefnt er því að því þættirnir fari í loftið í febrúarlok. Serían ber heitið Veiðin með Gunnari Bender og eru spennandi gestir og veiðistaðir í þessari seríu.

Össur Skarphéðinsson og Nils Folmer kíkja á urriða í Þingvallavatni. Þar eru þeir báðir á heimavelli. Ljósmynd/María Gunnarsdóttir

„Við hófum að mynda strax í byrjun sumars og fyrsti staðurinn var Þjórsá, það tók nákvæmlega eina mínútu að fá fyrsta laxinn í ausandi rigningu, en þetta byrjaði flott,“ sagði Gunnar Bender í samtali við Sporðaköst. Hann hélt áfram. „Það verður farið víða.“

Urriðaveiðin á Þingvöllum verður tekin fyrir og þar mæta þeir Össur Skarphéðinsson og Nils Folmer. Fleiri fyrrverandi stjórnmálamenn verða á skjánum en Benderinn fylgdist með Guðna Ágústssyni við opnun Norðurár í vor. 

Þjórsá í byrjun veiðitíma. Fyrsti laxinn lét ekki bíða eftir sér. Tók eina mínútu upplýsir Benderinn. Ljósmynd/María Gunnarsdóttir

„Hann fór á kostum í veiðinni. Við áttum skemmtilegar stundir við Leirvogsá. Mynduðum hörkubleikjuveiði í Miðá í Dölum, sem Stangaveiðifélag Reykjavíkur var að taka á leigu fyrir fáum dögum. Gljúfurá var heimsótt og tekin staðan þar.“

Fyrirtækið Hafdal annaðist upptökur á efni fyrir þættina.

Gunnar og hans menn eru enn að mynda en til stendur að taka upp þátt um dorgveiði í vetur. Hann tekur þó skýrt fram að það snúist um að ísinn verði vel mannheldur. 

„Það voru ekki margir að þvælast fyrir okkur í sumar að mynda, enda er maður orðinn síðasti Móhíkaninn í þessu,“ sagði Gunnar Bender og hló sínum þjóðþekkta hlátri.

• Blogga um frétt

Seinustu hundraðkallar sumarsins