Selá í Vopnafirði er ein af þessum mögnuðu laxveiðiperlum sem Vopnafjörðurinn fóstrar. Áin er svo tær að undrum sætir. Þetta gerir það að verkum að veiðiálag á laxi er með hæsta móti enda sér hann fluguna langt að. Í myndbroti dagsins veiða þeir Sveinn Björnsson og Gísli Ásgeirsson Hamarshyl í Selá.
Af öllum þeim ám sem Sporðaköst hafa myndað í undir vatnsyfirborði er Selá sennilega sú eina sem hægt er að mynda bakka á milli. Skyggnið undir yfirborði er hreint út sagt magnað. Fæstar ár bjóða upp á meira skyggni en sem nemur nokkrum metrum. Í Selá kveður við annan tón.
Sjötíu prósent veiðiálag er á tveggja ára laxi í Selá en það þýðir að sjö af hverjum tíu stórlöxum sem ganga í ána veiðast. Veiðiálag á smálaxi er aðeins lægra eða fimmtíu prósent. Annar hver þeirra veiðist. Hluti af skýringunni er að þeir koma síðar í ána.
Hér sést vel hversu öflug veiðiaðferð hitchið er. Þegar litla plasttúban – gárutúban – skautar yfir laxinn í yfirborðinu er oft sem hann stenst ekki mátið.
Nú eru ekki nema fimm mánuðir þar til fyrstu laxveiðiárnar verða opnaðar á nýjan leik og aðeins tveir mánuðir í að sá silfraði fari að huga að heimferð til Íslands.
Það eru ekki nema þrír mánuðir þar til veiði á sjóbirtingi hefst og vötnin fara að opna eitt af öðru. Daginn er farið að lengja og þetta er allt upp á við.
Steingrímur Jón Þórðarson kvikmyndaði og klippti. Myndskeiðið er úr Sporðakastaþætti sem sýndur var vorið 2019 á Stöð 2.
Lengd á laxi | Veiðisvæði | Veiðimaður | Dagsetning Dags. |
---|---|---|---|
101 cm | Vatnsdalsá | Erlendur veiðimaður | 29. september 29.9. |
101 cm | Eystri-Rangá | Grzegorz Loszewski | 27. september 27.9. |
105 cm | Hvítá við Iðu | Katrín Tanja Davíðsdóttir | 24. september 24.9. |
101 cm | Víðidalsá | Jón Eðvald Halldórsson | 22. september 22.9. |
107 cm | Grímsá | Jón Jónsson | 22. september 22.9. |
101 cm | Miðfjarðará | Agnar Sigurjónsson | 22. september 22.9. |
101 cm | Hvítá við Iðu | Gunnar Pétursson | 20. september 20.9. |