Löndunin á þeim stóra – myndband

Við sögðum frá því í gær að Ólafur Vigfússon hefði landað draumafisknum á Farquhar kóralrifinu í Seychelles eyjaklasanum. Þetta reyndist 105 sentímetra Giant Trevally og viðureignin var dramatísk eins og Ólafur fór yfir í fréttinni í gær.

Hér birtist myndband af síðasta hluta viðureignarinnar. Fiskurinn er búinn að strauja á haf út og strika svo á ofsahraða í átt til veiðimannsins, þannig að hann hafði ekki möguleika á að draga nægilega hratt inn á hjólið og varð því að taka til fótanna inn á sandeyjuna.

Þegar hér er komið sögu er leiðsögumaður, Cameron að grýta fiskinn til að fæla fisk sem hafði fylgt þeim tekna eins og skugginn. Þegar hann veður út í og tekur um línuna, er hann að passa að taumurinn rekist ekki í hvassa smákórala sem eru allt í kring. Þá gæti lína skorist í sundur á augabragði.

Ekki tókst að taka hefðbundnar myndir af GT og veiðimanni enda átti leiðsögumaðurinn í mestu erfiðleikum með að hemja þennan mikla fisk. Eftir mælingu kvaddi hann upp á sitt einsdæmi. En sjón er sögu ríkari.

• Blogga um frétt

Seinustu hundraðkallar sumarsins