„Ég hef veitt sjóbirting á flugu í sjó hér í Arnarfirði og nágrenni í meira en þrjátíu ár og hef aldrei séð neitt í líkingu við þetta. Ég taldi 51 lús á honum. Ég hef alveg veitt birtinga með lús oft áður og þær geta alveg farið upp í að fimm, sex jafnvel sjö á þessum stærri fiski og þá í kringum veiðiugga eða aftur við stirtlu,“ sagði Ívar Örn Hauksson í samtali við Sporðaköst.
Hann veiddi lítinn sjóbirting í gær og eins og fyrr segir taldi hann 51 lús á honum. Hann telur að þær hafi verið fleiri því það vantaði víða hreisturflögur á fiskinn og ummerki sáust á honum eftir fleiri lýs.
Það er ekki langt í sjókvíaeldi í Arnarfirðinum þar sem Ívar Örn veiddi birtinginn. Ein helsta ógn sem Norðmenn hafa tilkynnt um í tengslum við sjókvíaeldi er mikið af lús og berst hún á villtan fisk og getur drepið hann. Ívar Örn kannast við þetta og hefur kynnt sér umhverfismat í tengslum við sjókvíaeldi. Þar segir hann að vitnað hafi verið til norskra heimilda þess efnis að ellefta lúsin sem fiskur fær sig ríði baggamuninn og þá séu allar líkur á að hann drepist ef fiskurinn er ungur.
Hann tók myndirnar sem fylgja fréttinni og sýna þær greinilega mikið magn af lús á fiskinum og þá ekki síst á höfði og tálknum. Eftir að hafa hreinsað lýsnar af sjóbirtingnum sleppti hann honum aftur.
Andstæðingar sjókvíaeldis á Íslandi hafa bent á hættuna af mikilli lúsahættu í kringum sjókvíaeldi. Því hefur alltaf verið hafnað en ljóst er að þessi birtingur hefur lent í aðstæðum sem eru mjög ólíkar því sem gerist og gengur. Ástæða er til að hvetja fólk og sérstaklega veiðimenn til að fylgjast með lús á laxfiskum og tilkynna ef þeir verða varir við tilvik líkt og þetta. Mikilvægt er að halda utan um slík atvik.
Lengd á laxi | Veiðisvæði | Veiðimaður | Dagsetning Dags. |
---|---|---|---|
101 cm | Vatnsdalsá | Erlendur veiðimaður | 29. september 29.9. |
101 cm | Eystri-Rangá | Grzegorz Loszewski | 27. september 27.9. |
105 cm | Hvítá við Iðu | Katrín Tanja Davíðsdóttir | 24. september 24.9. |
101 cm | Víðidalsá | Jón Eðvald Halldórsson | 22. september 22.9. |
107 cm | Grímsá | Jón Jónsson | 22. september 22.9. |
101 cm | Miðfjarðará | Agnar Sigurjónsson | 22. september 22.9. |
101 cm | Hvítá við Iðu | Gunnar Pétursson | 20. september 20.9. |