Stefnir í bestu veiði frá árinu 2007

Erlend veiðikona með lax á efsta svæðinu í Hofsá. Fiskur …
Erlend veiðikona með lax á efsta svæðinu í Hofsá. Fiskur er vel dreifður um ána og áin er töluvert yfir meðallagi í vatni. Veiðin er orðin meiri en áin gaf allt sumarið í fyrra. Ljósmynd/SRP

Veiðin á NA–horni landsins hefur verið mun betri en í fyrra og að öllum líkindum bjartasti punkturinn í frekar slöku laxveiðisumri. Hofsá, sú fornfræga á, fór í gær í 604 laxa. Það er þremur löxum meira en heildarveiði síðasta sumars þegar hún skilaði 601 laxi. Sumarið 2020 þótti gott í Vopnafirðinum og fór Hofsá þá yfir þúsund laxa í fyrsta skipti í sjö ár.

Eins og útlitið er núna bendir allt til þess að heildarveiðin verði sú besta frá árinu 2007 þegar áin skilaði 1.435 löxum. Selá er á svipuðu róli og Hofsá með um sex hundruð laxa og ljóst að veiðin verður mun meiri en í fyrra þegar hún endaði í rétt tæplega átta hundruð löxum. Veiðiálag í Selá er með öðrum hætti en í flestum íslenskum laxveiðiám. Þar er kvóti upp á fjóra laxa og ber veiðimanni að hætta þegar þeim fjölda er náð, óháð því að öllum fiskinum hafi verið sleppt.

Gott dæmi um NA–hornið er Sandá. Þar voru komnir á land 211 laxar í gærkvöldi og telst það mjög góð veiði á þeim bænum á þessum tíma sumars.

En aftur að Hofsá. Þar er mikið af smálaxi þetta sumarið og eins og hefur loðað við árnar í Vopnafirði er þar alltaf töluvert af mjög smáum smálaxi, allt niður í fjörutíu sentímetra. Þeir eru á sínum stað í sumar en einnig er töluvert af stærri smálaxi og þokkalegt magn af stórlaxi. 

Meðaltalsveiði í Hofsá síðastliðin þrjátíu ár er um þúsund laxar og ljóst að áin fer vel yfir það meðaltal í sumar nema eitthvað óvænt komi upp á.

Öll sjö svæði árinnar eru inni og segir það enn frekar til um magnið af fiskinum því það hefur loðað við Hofsá síðari ár að neðri hlutinn verður hálf tómur þegar líður á sumar. Nú eru veiðistaðir um alla á vel inni enda hafa veiðitölur síðustu daga verið frá tuttugu löxum og jafnvel meira á dag.

Nú styttist í stóran straum og því viðbúið að veiðin haldi áfram dampi með nýjum fiskum sem eru að koma daglega úr hafi.

mbl.is

Seinustu hundraðkallar sumarsins

Lengd á laxi Veiðisvæði Veiðimaður Dagsetning Dags.
101 cm Vatnsdalsá Erlendur veiðimaður 29. september 29.9.
101 cm Eystri-Rangá Grzegorz Loszewski 27. september 27.9.
105 cm Hvítá við Iðu Katrín Tanja Davíðsdóttir 24. september 24.9.
101 cm Víðidalsá Jón Eðvald Halldórsson 22. september 22.9.
107 cm Grímsá Jón Jónsson 22. september 22.9.
101 cm Miðfjarðará Agnar Sigurjónsson 22. september 22.9.
101 cm Hvítá við Iðu Gunnar Pétursson 20. september 20.9.

Skoða meira

Fleira áhugavert
Fleira áhugavert