Tvíveiddur lax lengdist um sentímetra

Theódór og Helgi mæla fiskinn þann 2. ágúst. Hann mældist …
Theódór og Helgi mæla fiskinn þann 2. ágúst. Hann mældist sléttir hundrað sentímetrar. Ljósmynd/María Guðjónsdóttir

Stærsti laxinn til þessa í Miðfjarðará í sumar veiddist í vikunni og mældist 101 sentímetri. Áður hafði veiðst lax sem mældist 100 sentímetrar. Báðir þessir laxar veiddust í Grjóthyl. Nú er komið á daginn að þetta er sami laxinn. Samanburður á myndum af fiskunum tveimur tekur af allan vafa um þetta.

Fyrst veiddi Theódór Friðjónsson laxinn 2. ágúst og það á Collie dog flottúbu. Með Theódór var Helgi Guðbrandsson leiðsögumaður og mældu þeir fiskinn í sameiningu upp á slétta hundrað sentímetra. Fiskinum var sleppt og birtar myndir af honum.

Svo gerðist það síðastliðinn miðvikudag að Stebbi Lísu var að veiða Grjóthyl og setti í svakalegan fisk sem mældist 101 sentímetri og þar með sá stærsti í Miðfirðinum í sumar. Tók fiskurinn Black Brahan flugu númer tólf.

Ljósmynd/María Guðjónsdóttir
Ef myndirnar eru bornar saman sést greinilega að um sama …
Ef myndirnar eru bornar saman sést greinilega að um sama fisk er að ræða. Einkennandi doppur á honum aftan við augun segja sína sögu. Þegar hann var veiddur í seinna skiptið er fallegur rauður litur kominn í kringum þær. Ljósmynd/Guðbjartur Haraldsson


Helgi Guðbrandsson leiðsögumaður taldi sig kannast við laxinn og bar saman myndir af þessum tveimur fiskum og kom fljótt og örugglega í ljós að um sama fiskinn er að ræða.

Doppur á höfði hvers lax eru einstakar, ofurlítið eins og fingraför okkar mannfólksins.  Þegar myndirnar eru skoðaðar má sjá mjög skýrar doppur aftur frá auganu og einnig þrjár sem liggja í boga aðeins ofar.

Það að fiskurinn mælist nú einum sentímetra lengri er fullkomlega eðlilegt þar sem skolturinn gengur fram og krókurinn verður vígalegur. Þessar mælingar segja okkur að hann hafi verið nákvæmlega mældur í bæði skiptin. Svona virkar veiða og sleppa.

mbl.is

Seinustu hundraðkallar sumarsins

Lengd á laxi Veiðisvæði Veiðimaður Dagsetning Dags.
102 cm Laxá í Aðaldal Aðalsteinn Jóhannsson 19. september 19.9.
103 cm Víðidalsá Rob Williams 17. september 17.9.
101 cm Stóra - Laxá Jim Ray 16. september 16.9.
102 cm Víðidalsá Svanur Gíslason 15. september 15.9.
101 cm Miðfjarðará Stebbi Lísu 14. september 14.9.
101 cm Víðidalsá Rögnvaldur Guðmundsson 12. september 12.9.
103 cm Ytri - Rangá Adrian Stauss 8. september 8.9.

Skoða meira